Թուրք-ադրբեջանական եղբայրությունը կարևոր գործոն է տարածաշրջանի, աշխարհի համար. Իլհամ Ալիև

«Այսօր Ադրբեջանում տոն է։ Անկախության օրն է։ Սա ամենանվիրական տոնն է։ Եվ սա կրկնակի տոն է, քանի որ մեզ հետ է իմ սիրելի եղբայր Էրդողանը։ Ես անկեղծորեն ողջունում եմ բոլոր հյուրերին: Վերջին 30 տարիների ընթացքում Ադրբեջանը միշտ զգացել է եղբայրական Թուրքիայի աջակցությունը։ Թուրք-ադրբեջանական եղբայրությունը մեր ժողովուրդների համար հիմնական վեկտորն է: Սա շատ կարևոր գործոն է թե՛ տարածաշրջանի, թե՛ աշխարհի համար։ Սա անվտանգության, վստահության, կայունության գործոն է»։

Ինչպես հաղորդում է Caliber.Az-ը, այս մասին ասել է Ադրբեջանի նախագահ Իլհամ Ալիևը՝ ելույթ ունենալով «TEKNOFEST Azərbaycan» փառատոնում։

«Որքան ավելի վստահ միասին քայլեն Թուրքիան և Ադրբեջանը, այնքան ավելի ամուր կլինի խաղաղությունն ու հանգստությունը մեր տարածաշրջանում։ Սա մենք և ողջ աշխարհը տեսանք Երկրորդ Ղարաբաղյան պատերազմի ժամանակ։ Թուրքիան մեր կողքին էր: Այն, որ իմ սիրելի եղբայր Էրդողանը պատերազմի առաջին ժամերին հայտարարեց, որ «Ադրբեջանը մենակ չէ, Թուրքիան Ադրբեջանի կողքին է», մեզ լրացուցիչ ուժ տվեց։ Ադրբեջանական ժողովուրդը դա երբեք չի մոռանա։ Մենք գունեղ պատմություն ունենք, և մեր պատմության կարևորագույն պահերին մենք միասին ենք եղել։

Հիշում եմ, որ հայկական օկուպացիայից Բաքվի ազատագրմանը նվիրված զորահանդեսին թուրք և ադրբեջանցի զինվորները ուս-ուսի քայլում էին Ազադլըգ հրապարակով։ Մենք տեսանք դրա կրկնությունը 2021 թվականին Հաղթանակի շքերթում»,- հավելել է նախագահը։