AZAL ինքնաթիռի վթար. Պաշտոնական Բաքուն մեղադրում է Մոսկվային հանրությանը մոլորեցնելու մեջ

Ռուսաստանի արտաքին գործերի նախարարության սեպտեմբերի 4-ի հայտարարությունը՝ «Ադրբեջանական ավիաուղիներ»-ի (AZAL) խոցված ինքնաթիռի վթարի հետ կապված ապահովագրական վճարումների վերաբերյալ ոչ միայն զարմանալի է, այլև մոլորեցնող է հանրության համար։
 
Ինչպես հաղորդում է Caliber.Az-ը, այս մասին ասվում է՝ Ադրբեջանի արտաքին գործերի նախարարության մամուլի քարտուղար Այխան Հաջիզադեի մեկնաբանության մեջ։
 
Նրա խոսքով՝ Ռուսաստանում գրանցված ապահովագրական ընկերությունից AZAL-ի և ուղևորների համար ապահովագրական վճարումները և ինքնաթիռի վթարի հետ կապված՝  Ռուսաստանի կառավարությունից Ադրբեջանի փոխհատուցման պահանջները բոլորովին տարբեր հասկացություններ են, և դրանց միջև հավասարության նշան դնելը հիմնարար սխալ է։

«Ապահովագրական վճարումների կատարման գործընթացն արդեն 6 ամիս է, ինչ շարունակվում է, և այդ վճարումները տրամադրվում են AZAL ապահովագրական պայմանագրի շրջանակներում, այսինքն՝ դրանք պարտավորություններ են ինքնաթիռի և ուղևորների ապահովագրության շրջանակներում: Ինչ վերաբերում է այն փաստին, որ վճարումները կատարում է ռուսական ապահովագրական ընկերությունը,  ապա  պետք է նշել, որ սովորաբար ինքնաթիռների ապահովագրությունն իրականացվում է միջազգային ապահովագրողների միջոցով: Հաշվի առնելով, որ Ռուսաստանում ոչ մի միջազգային ապահովագրական ընկերություն չի գործում, AZAL ինքնաթիռը ապահովագրվել է ռուսական ընկերության միջոցով», - հայտնել է Ա. Հաջիզադեն: