Ինչո՞ւ են հայերին թույլատրում Ադրբեջան մտնել փակ ցամաքային սահմանների պայմաններում Պարզաբանում է Caliber.Az-ը

Նախօրեին՝ ապրիլի 30-ին, ադրբեջանա-հայկական պայմանական սահմանին Լաչինի սահմանային անցակետի տեղադրումից մեկ շաբաթ անց, անցակետն արդեն սկսվել է գործել: Ադրբեջանական կողմի տարածած տեսանյութում երևում է, թե ինչպես են Ադրբեջանի հայազգի քաղաքացիները կազմակերպված և կարգապահ կերպով, փոխադարձ քաղաքավարության մթնոլորտում անցնում սահմանային անցակետով։ Ադրբեջանցի սահմանապահները ցուցաբերում են բարձր պրոֆեսիոնալիզմ:

Սակայն այս տեսագրությունները ադրբեջանական հասարակության մոտ հարցերի տեղիք են տվել։ Գլխավոր հարցը հետևյալն է. «Եթե Ադրբեջանի ցամաքային սահմանները փակ են, ապա ինչո՞ւ են բացառություններ արվում մասնավոր տրանսպորտային միջոցներով Ղարաբաղ ելումուտ անող հայերի համար»:

Հարցն արդարացի է, և Caliber.Az-ը փորձել է դրան պատասխանել ավելի լայն համատեքստում։

Նախ, այժմ Ադրբեջանի համար ամենակարևորը Հայաստանի կողմից ակտիվորեն շրջանառվող կեղծ «շրջափակման նարատիվը» կոտրելն է։ Սահմանային անցակետն աշխատում է, մարդիկ նույնականացվում են, տրանսպորտը ստուգվում է, անցումն ապահովվում է։ Ի դեպ, այս մասին ԱՄՆ պետքարտուղար Էնթոնի Բլինքենի հետ հեռախոսազրույցում հայտարարել է նաև Ադրբեջանի նախագահ Իլհամ Ալիևը։ Երկրի ղեկավարն ընդգծել է, որ Լաչինի սահմանային անցակետի նպատակը ոչ թե երթևեկության սահմանափակումն է, այլ հակառակը՝ հսկողություն ապահովումը, և մարդիկ արդեն անցնում են այդ անցակետով։

Երկրորդը՝ նախքան սահմանային անցակետի գործարկումն էլ հայերը ելումուտ էին անում Ադրբեջանի տարածք՝ ՌԽԶ-ի և ԿԽՄԿ-ի ուղեկցությամբ։ Այսինքն՝ նրանց համար «բացառությունների» որոշակի ռեժիմ նախկինում էլ գործում էր։

Երրորդը՝ ռուս խաղաղապահների ժամանակավոր վերահսկողության տակ գտնվող Ղարաբաղի շրջան մուտք գործող քաղաքացիները համաճարակաբանական վտանգ չեն ներկայացնում Ադրբեջանի մնացած բնակչության համար՝ առայժմ մեր հասարակությանը չինտեգրվելու պատճառով։

Եվ, վերջապես, չորրորդ. մինչև 2020 թվականի նոյեմբեր մենք դեռ երազում էինք Շուշայի մասին, իսկ Լաչինի ճանապարհին անցակետ տեղադրելու գաղափարը հազիվ իրագործելի էր թվում։ Ամեն ինչ իր ժամանակն ունի, ամեն ինչ քայլ առ քայլ կկարգավորվի։ Ադրբեջանի նախագահը գիտի, թե ինչ, երբ և ինչպես անել։