Բաքվում Euronews հեռուստաալիքի գրասենյակ է բացվել

Եվրոպական Euronews հեռուստաալիքի գրասենյակի բացումը Բաքվում հնարավոր է դարձել՝ Ադրբեջանի հետ համագործակցության շնորհիվ։
 
Report-ի փոխանցմամբ՝ այս մասին Բաքվի գրասենյակի բացման արարողությանը հայտարարել է՝ Euronews-ի տնօրենների խորհրդի նախագահ Պեդրո Վարգաս Դավիդը։
 
«Այսօր ինձ հաամար մեծ պատիվ և հպարտություն է՝  ձեր առջև կանգնել և պաշտոնապես բացել Euronews-ի գրասենյակը Բաքվում։ Euronews-ը Եվրոպայի առաջատար լրատվական ալիքն է, որը հեռարձակվում է 20 լեզվով։ Մեզ ամեն ամիս դիտում  է ավելի քան 145 միլիոն մարդ։ Մեր ներկայությունը հնարավոր է դարձել Ադրբեջանի հետ համատեղ կատարած աշխատանքի շնորհիվ», - նշել է հեռուստաալիքի ղեկավարը։
 
Պեդրո Վարգաս Դավիդը ընդգծել է Euronews-ի եզակի դերը՝ որպես անկախ և չեզոք լրատվամիջոց. «Մենք հենվում ենք փաստերի վրա, պահպանում ենք հավասարակշռությունը և ձգտում ենք ցույց տալ ճշմարտությունը։ Աշխարհում, որտեղ լրատվամիջոցները ավելի ու ավելի շատ որոշակի դիրք են զբաղեցնում, իսկ Հանրային բանավեճը բևեռացվում է, չեզոքությունը որակյալ լրագրության գրավականն է»։