Իրանին նոտա են հանձնել՝ կապված Ադրբեջանի քաղաքացու անհետացման հետ

Իրանին նոտա են հանձնվել այդ երկրում Ադրբեջանի քաղաքացու անհետացման կապակցությամբ։

Ինչպես հաղորդում է Caliber.Az-ը, այս մասին ասել է Ադրբեջանի արտաքին գործերի նախարարության մամուլի ծառայության ղեկավար Այխան Հաջիզադեն՝ պատասխանելով տեղական լրատվամիջոցների ներկայացուցիչների հարցին։

Նրա խոսքով, 2023 թվականի մարտի 9-ին Ադրբեջանի արտաքին գործերի նախարարությունը դիմում է ստացել այն մասին, որ Ադրբեջանի Հանրապետության քաղաքացի, Գերմանիայի Յենայի համալսարանի ուսանող Ֆարիդ Գաբիլ օղլու Սաֆարլին՝ ծնված 1997 թ., սույն թվականի փետրվարի 20-ին մեկնել է Իրանի Իսլամական Հանրապետություն, սակայն մարտի 4-ից նրա մասին ոչ մի լուր չկա.

«Այս տեղեկությունը ճշտելու նպատակով ԱԳՆ-ն նոտա է հղել մեր երկրում Իրանի դեսպանատուն և այս պահին սպասում է պատասխանի։ Ադրբեջանի քաղաքացի Ֆարիդ Սաֆարլիի գտնվելու վայրը պարզելու համար համապատասխան աշխատանքները շարունակվում են։ Այս հարցի վերաբերյալ հանրությանը կտրամադրվի լրացուցիչ տեղեկատվություն»։

Հաջիզադեն հիշեցրել է, որ 2023 թվականի հունվարի 27-ին Իրանում մեր երկրի դեսպանատան վրա տեղի ունեցած ահաբեկչական հարձակումից հետո Ադրբեջանի Հանրապետության արտաքին գործերի նախարարությունը նախազգուշացում է արել երկրի քաղաքացիներին՝ հորդորելով առանց ծայրահեղ անհրաժեշտության չմեկնել Իրանի Իսլամական Հանրապետություն, և նրանք, ովքեր այցելում են այդ երկիր, պետք է առավել զգույշ լինեն: