Մարկով. «Առաջին ալիքով» սադրանքը կազմակերպել է գործարար Ռուբեն Վարդանյանի ցանցը

Ռուսական «Առաջին ալիքի» «Մեծ խաղ» թոք-շոուի եթերում արված հայտարարություններն ուղղակիորեն հակասում են ռուսական պետության և նախագահ Վլադիմիր Պուտինի դիրքորոշմանը։

Այդ մասին Caliber.Az-ին ասել է՝ Ռուսաստանի Քաղաքական հետազոտությունների ինստիտուտի տնօրեն, քաղաքագետ Սերգեյ Մարկովը։

Նրա խոսքով, այս սադրանքը, որը տեղի է ունեցել «Առաջին ալիքով», կազմակերպել է հայ գործարար Ռուբեն Վարդանյանի ցանցը. «Հայտնի է, որ նա գնացել է Ադրբեջանի տարածք և դարձել՝ այնտեղ գոյություն ունեցող անջատողական օկուպացիոն ռեժիմի «պետնախարար»: Սակայն Վարդանյանը ռուս միլիարդատեր է և իր մարդկանցից շատերն ունի ռուսական լրատվամիջոցներում, այդ թվում՝ ռուսական հեռուստաալիքներում։ Նրանց մեջ կան նաև ռուսներ, ովքեր արմատական հայամետ դիրքորոշում են զբաղեցնում։ Այդ մարդկանցից է «Առաջին ալիքի »թոք-շոուի հաղորդավար Արտյոմ Շեյնը: Իհարկե, նման ելույթները թշնամության սերմեր են ցանում Ռուսաստանի և Ադրբեջանի միջև, որոնք բարեկամ երկրներ են։ Պետք է դադարեցնել նման ելույթները։ Կարծում եմ, որ Ադրբեջանը պետք է կոշտ ձևով բարձրացնի Վարդանյանի ցանցի հակաադրբեջանական գործունեությունը կասեցնելու հարցը։ Իսկ առանց այդ էլ Վարդանյանը հրաժարվեց ՌԴ քաղաքացիությունից, հիմա ավելի շատ աջակցություն է ստանում Ռուսաստանի թշնամիներից՝ Ֆրանսիայից ու ԱՄՆ-ից։ Ուստի հիմա հարմար պահ է ռուսական լրատվամիջոցներում Վարդանյանի հակաադրբեջանական ցանցին վերջ տալու համար։ Որովհետեւ այս ցանցը փաստացի սկսել է հակադրվել Ռուսաստանի պետական շահերին՝ փորձելով փչացնել Մոսկվայի հարաբերությունները Ադրբեջանի եւ Թուրքիայի հետ»։

Մարկովը նշել է նաև, որ «Առաջին ալիքից» արհեստականորեն դուրս են մղվել Պուտինի քաղաքականության կողմնակիցները, որը ենթադրում է Ռուսաստանի բարեկամություն Ադրբեջանի և Թուրքիայի հետ։