Ջեյլան. Մենք վստահ ենք, որ Բաքվի և Երևանի միջև խաղաղության համաձայնագիրը հիմնված կլինի տարածքային ամբողջականության սկզբունքի վրա

Մենք վստահ ենք, որ Ադրբեջանի և Հայաստանի միջև խաղաղության պայմանագիրը հիմնված է լինելու տարածքային ամբողջականության սկզբունքի վրա։

Ինչպես հաղորդում է Caliber.Az-ը, այս մասին ասել է Թուրքիայի իշխող Արդարություն և զարգացում կուսակցության (AK Parti) արտաքին հարաբերությունների գծով փոխնախագահ Մեհմեթ Ջեյլանը Ասիական քաղաքական կուսակցությունների «Անվտանգություն և համագործակցություն. քաղաքական կուսակցությունների դերը» միջազգային համաժողովում, որը կազմակերպել է Բաքվում «Ենի Ազերբայջան» (Նոր Ադրբեջան) կուսակցությունը (YAP):

Նրա խոսքով, այսօր թուրք-ադրբեջանական հարաբերություններն ու համերաշխությունն ավելի ամուր են, քան երբևէ. «Թե՛ լավ, թե՛ վատ ժամանակներում Թուրքիան եղել է Ադրբեջանի կողքին, իսկ Ադրբեջանը՝ Թուրքիայի։ Շուշայի հռչակագրի ստորագրմամբ կողմերը հարաբերությունները հասցրին ամենաբարձր մակարդակի։ Այսօր տարածաշրջանում աննախադեպ պայմաններ են ստեղծվել կայուն խաղաղություն և կայունություն ապահովելու համար։ Թուրքիան մեծ հույսեր է կապում տարածաշրջանում հարաբերությունների կարգավորման հետ, այլ ճանապարհ չկա»։