Ջեյհուն Բայրամովը իսրայելցի գործընկերոջը տեղեկացրել է հայկական սադրանքների մասին ԼՈՒՍԱՆԿԱՐ

Մարտի 29-ին Իսրայել կատարած պաշտոնական այցի շրջանակներում Ադրբեջանի արտգործնախարար Ջեյհուն Բայրամովը հանդիպել է այդ երկրի արտգործնախարար Էլի Քոհենի հետ։

Ինչպես Caliber.Az-ին հայտնել են ԱԳՆ-ում, հանդիպմանը գոհունակություն է արտահայտվել երկկողմ և բազմակողմ ձևաչափերում Ադրբեջանի և Իսրայելի միջև համագործակցության կապակցությամբ, քննարկվել են քաղաքական, տնտեսական, առևտրային, էներգետիկ, կրթական, բարձր տեխնոլոգիաների, ռազմատեխնիկական և հումանիտար ոլորտներում կապերի զարգացման վերաբերյալ հարցեր:

Նշելով, որ Ադրբեջանի և Իսրայելի միջև կապերը հիմնված են պատմական բարեկամության և համագործակցության վրա՝ նախարար Ջեյհուն Բայրամովն ընդգծել է, որ ինտենսիվ փոխայցելությունները դրական են ազդում հարաբերությունների հետագա զարգացման վրա։ Նրա խոսքով, երկու երկրների արտաքին քաղաքական գերատեսչությունների միջև այս տարվա հունվարին Բաքվում կայացած ռազմավարական երկխոսությանը զուգահեռ՝ ամուր բարեկամության և գործընկերության ցուցիչ է նաև Եվրասիական երկրներում Իսրայելի դեսպանների պաշտոնական հանդիպումը Բաքվում՝ Իսրայելի ԱԳՆ կենտրոնական ապարատի բարձրաստիճան աշխատակիցների մասնակցությամբ: Ընդգծվել է, որ Իսրայելում Ադրբեջանի դեսպանատան բացումը կնպաստի ռազմավարական դաշնակցային կապերի ամրապնդմանը։

Հանդիպմանը Ջեյհուն Բայրամովն իր գործընկերոջը տեղեկացրել է տարածաշրջանում հետհակամարտային շրջանում խաղաղության, անվտանգության և համագործակցության հաստատմանն ուղղված Ադրբեջանի նախաձեռնությունների մասին։ Նա նշել է, որ, չնայած այս ջանքերին՝ Հայաստանը մշտապես սադրանքների է դիմում և վնասում գործընթացին։ Նախարարն իր զրուցակցին տեղեկացրել է նաև օկուպացիայից ազատագրված տարածքների ականազերծման, լայնածավալ վերականգնողական և շինարարական աշխատանքների ընթացքի մասին՝ գոհունակությամբ նշելով իսրայելական ընկերությունների մասնակցությունն այդ գործընթացին։