Ռուսական պորտալն ուղղել է Ադրբեջանի վերաբերյալ կոպիտ սխալը

Gismeteo օդերևութաբանական պորտալը սխալ է անվանել իր պաշտոնական կայքի ինտերակտիվ քարտեզում այսպես կոչված «Լեռնային Ղարաբաղի Հանրապետություն» անվանումը նշելը։

Ինչպես հայտնում է Caliber.Az-ը, կազմակերպության մամուլի ծառայությունն այսպես է պատասխանել NEWS.ru-ի հարցմանը։ Պորտալի ներկայացուցիչներն ընդգծել են, որ սխալը թույլ են տվել Open Street Map քարտեզների մշակողները։

«Ստեղծված իրավիճակը կապված է Open Street Map քարտեզների մշակողների թույլ տված սխալի հետ: Մենք կապ չունենք քարտեզի վրա անուններ նշելու հետ։ Մենք առաջնորդվում ենք Ռուսաստանի Դաշնության օրենսդրությամբ։ Gismeteo-ում վիճելի անվան հետ կապված որևէ հիշատակում չկա»,- ասվում է հաղորդագրության մեջ։

Կազմակերպությունը ձեռնարկել է բոլոր անհրաժեշտ միջոցները այս խնդիրը լուծելու և պորտալի քարտեզներում սխալ տեղանունները բացառելու համար։

Նշենք, որ Gismeteo օդերևութաբանական ինտերնետային պորտալում տեղադրվել էր այսպես կոչված «ԼՂՀ»-ի ինտերակտիվ քարտեզը։

Ռուսական պորտալը գրում է, որ դա առաջացրել է ադրբեջանական հասարակության վրդովմունքը, «քանի որ Բաքուն բազմիցս հայտարարել է, որ ղարաբաղյան հակամարտությունն անցյալում է, և երկրի տարածքում չկա Լեռնային Ղարաբաղ անունով վարչատարածքային միավոր։ Նման քարտեզի տեղադրումը խախտում է Ռուսաստանի Դաշնության և Ադրբեջանի Հանրապետության միջև դաշնակցային փոխգործակցության մասին հռչակագրի 11-րդ կետը»: