«Փաշինյանից պահանջում ենք երկխոսություն սկսել Արևմտյան Ադրբեջանի համայնքի հետ» Հայտարարություն

«Արևմտյան Ադրբեջանի Համայնքը, որը ներկայացնում է Հայաստանից վտարված ադրբեջանցիներին և պաշտպանում է նրանց վերադառնալու իրավունքը, խստորեն դատապարտում է Հայաստանի վարչապետ Նիկոլ Փաշինյանի հերթական սուտ հայտարարությունները։ Ինչպես երևում է օրեր առաջ հրապարակված տեսանյութից, հուլիսի 25-ին մամուլի ասուլիսում Փաշինյանը հայտարարեց, որ Հայաստանից ադրբեջանցիները «կամավոր են հեռացել», և իբր նրանց «փոխհատուցում» է տրվել։

Caliber.Az-ի փոխանցմամբ՝ այս մասին ասվում է համայնքի հայտարարության մեջ։

«Մենք կտրականապես հերքում ենք այն պնդումը, թե Հայաստանից վտարված ադրբեջանցիները իբր վերադարձի իրավունքից հրաժարվելու դիմաց փոխհատուցում են ստացել։ Մենք հաստատակամ ենք մեր պահանջի մեջ՝ ապահովելու Հայաստանում մեր պապենական հողեր վերադառնալու մեր իրավունքը: Ուզում ենք նշել, որ «փոխհատուցում» բառի օգտագործումն արդեն իսկ նշանակում է ապօրինի արարքի կատարման և պատճառած վնասների ճանաչում, ինչը հակասում է ինքնակամ հեռանալու մասին հայտարարություններին։

Վտարանդի ադրբեջանցիների՝ իրենց հայրենիք վերադառնալու իրավունքն ապահովելուց Հայաստանի կառավարության հրաժարվելը ցույց է տալիս, թե որքան անազնիվ է այս պետությունը իր պնդումներում, թե իբր հավատարիմ է ժողովրդավարական արժեքներին և մարդու իրավունքների հարգմանը։ Սա նաև ապացուցում է ադրբեջանցիների նկատմամբ ազգամիջյան խտրականությունն ու ատելությունը։

Կոչ ենք անում Հայաստանին հետևել ադրբեջանական կողմի օրինակին, որը թույլ տվեց հայերին 2020 թվականին հակամարտության ավարտից հետո անվտանգ վերադառնալ Ադրբեջանի Ղարաբաղի շրջան։ Հայաստանը պետք է հավասար հարգանք դրսևորի մարդու իրավունքների և միջազգային իրավունքի նկատմամբ, ապահովի Հայաստանից վտարված ադրբեջանցիների՝ իրենց տներ անվտանգ և արժանապատիվ վերադառնալու իրավունքը։ Մենք պահանջում ենք Հայաստանի կառավարությունից դադարեցնել կեղծ հայտարարությունների տարածումը և առարկայական երկխոսություն սկսել Արևմտյան Ադրբեջանի Համայնքի հետ՝ Հայաստանից վտարված ադրբեջանցիների օրինական մտահոգությունների վերաբերյալ»,- ասվում է հայտարարության մեջ։