Ֆրանսիայում ապրող ադրբեջանցիները բողոք են հայտնել Էվիան-լե-Բեն քաղաքի քաղաքապետարանի որոշման դեմ

Ֆրանսիայի Էվիան-լե-Բեն քաղաքի քաղաքապետարանի որոշումը՝ հեռացնել քաղաքում բոլոր ցուցանակները, որոնք կապված են «Ադրբեջանական զբոսայգի» անվանման հետ, վրդովմունք է առաջացրել այս երկրում բնակվող ադրբեջանական համայնքի մոտ։

Ինչպես հայտնում է Caliber.Az-ը, Ֆրանսիայի Ադրբեջանցիների համակարգող խորհրդի հայտարարության մեջ՝ ուղղված Արտաքին գործերի նախարարությանը, խորհրդարանին և Էվիան-լե-Բեն քաղաքի քաղաքապետարանին, նշվում է, որ այս անընդունելի իրադարձությունը դիտարկվել է որպես՝ 2015 թվականին Ադրբեջանի Իսմայիլլի և Ֆրանսիայի Էվիան-լե-Բեն քաղաքների միջև ստորագրված փոխադարձ բարեկամության և համագործակցության խարտիայի կոպիտ խախտում: Ընդգծվել է, որ հենց այս խարտիայով 2017 թվականին այս քաղաքում բացվել է՝ «Ադրբեջանական զբոսայգին» և կանգնեցվել է՝ աշխարհի կանանց ազատության խորհրդանիշը հանդիսացող, ադրբեջանցի նշանավոր բանաստեղծուհի Խուրշիդբանու Նաթավանի հուշարձանը:

Հիշեցնելով, որ Ադրբեջանն ու Հայաստանն արդեն գտնվում են խաղաղության պայմանագիր կնքելու համար բանակցությունների փուլում, իսկ Իսմայիլլի քաղաքը երբեք չի եղել երկու երկրների միջև վեճի առարկա, Համակարգող խորհուրդը նշել է, որ քաղաքապետարանի որոշումը հակասում է Համայնքի ընդհանուր օրենսգրքի հոդվածին։