Անվտանգություն, սահմանազատում ու խաղաղության պայմանագիր Միշելի հայտարարությունը՝ Ալիևի և Փաշինյանի հետ հանդիպման արդյունքներով

ԵՄ կայքում հրապարակվել է ԵՄ նախագահ Շառլ Միշելի հայտարարությունը՝ Մոլդովայում Եվրոպական քաղաքական համայնքի 2-րդ գագաթնաժողովի շրջանակներում կայացած Ադրբեջանի, Հայաստանի, Ֆրանսիայի և Գերմանիայի առաջնորդների հետ հանդիպման արդյունքներով:

«Մենք շատ արդյունավետ հանդիպում ունեցանք նախագահ Ալիևի, վարչապետ Փաշինյանի, Ֆրանսիայի նախագահ Էմանուել Մակրոնի և Գերմանիայի կանցլեր Օլաֆ Շոլցի հետ։ Մենք հնարավորություն ունեցանք անդրադառնալու բոլոր այն թեմաներին, որոնք քննարկել ենք մայիսին Բրյուսելում՝ Ադրբեջանի և Հայաստանի միջև պետական սահմանի սահմանազատման և սահմանային անվտանգության հարցեր, խաղաղության պայմանագիր:

Այս հանդիպումը լավ նախապատրաստություն էր հաջորդ հանդիպման համար, որը տեղի կունենա Բրյուսելում հուլիսի 21-ին։ Դա նշանակում է, որ մենք քրտնաջան աշխատում ենք, և մտադիր ենք աջակցել բոլոր դրական ջանքերին հարաբերությունների կարգավորման ուղղությամբ։

Ես նաև հայտարարեցի, որ մտադիր եմ կրկին հրավիրել նախագահ Ալիևին, վարչապետ Փաշինյանին, կանցլեր Շոլցին և նախագահ Մակրոնին՝ Իսպանիայում կայանալիք Եվրոպական քաղաքական համայնքի հաջորդ հանդիպման շրջանակում։ Դա նշանակում է, որ մենք ամեն ինչ կանենք ԵՄ կողմից, որպեսզի օգնենք հարաբերությունների կարգավորման ուղղությամբ ավելի շատ առաջընթաց գրանցելուն»,-հայտարարել է Միշելը։