Գեներալ. Ադրբեջանական բանակն ամբողջությամբ անցել է թուրքական ձևաչափին

«Ադրբեջանական բանակն ամբողջությամբ անցել է թուրքական ձևաչափին։ Ուսուցումը, ծրագրերը, սարքավորումները, անձնակազմի կառուցվածքը, կառավարումն արդեն նոր ձևաչափի մեջ է»։

Ինչպես տեղեկացնում է Caliber.Az-ը, այս մասին հայտնել է՝ Հեյդար Ալիևի անվան Բարձրագույն ռազմական դպրոցի պետ, գեներալ-մայոր Ֆիզուլի Սալահովը։

Նա նշել է, որ Թուրքիայի հետ ռազմական ոլորտում փորձի փոխանակումն այսօր շարունակվում է.

«Մեկ տարուց ավելի է, ինչ նոր ծրագրերի վերաբերյալ ուսուցում է անցկացվում։ Մենք համարում ենք, որ կրթության այս մոդելն ավելի հզոր և արդյունավետ կլինի։ Ապագա սպաները ավելի լավ կրթված կլինեն ինչպես կառավարման, այնպես էլ որոշումներ կայացնելու կարողության առումով: Մյուս կողմից, ամենակարևորը հայրենասիրության, հողի հանդեպ սիրո, Գերագույն գլխավոր հրամանատարին հավատարմության զգացումների ուժեղ սերմանումն է։ Թուրքիայի հետ փորձի փոխանակումը հիմնականում օգնեց մեզ անցնել կրթության նոր ձևի։ Մեր ուսուցիչներն ու զինծառայողները վերապատրաստվել են Թուրքիայի առաջատար ուսումնարաններում։ Առաջիկայում Թուրքիայից ուսանողներ կգան, նրանք սովորելու են մեզ մոտ»։