Գլխավոր շտաբի պետն այցելել է Վրաստանի ազգային ուսումնամարզական կենտրոն

Պաշտոնական այցով Վրաստանում գտնվող Ադրբեջանի պաշտպանության նախարարի առաջին տեղակալ, Գլխավոր շտաբի պետ, գեներալ-գնդապետ Քերիմ Վելիևի գլխավորած պատվիրակությունը սեպտեմբերի 29-ին այցելել է Թբիլիսիի մերձակայքում գտնվող Կրծանիսի ազգային ուսումնամարզական կենտրոն:

Ինչպես հաղորդում է Caliber.Az-ը՝ վկայակոչելով պաշտպանության նախարարությանը, կազմակերպված ճեպազրույցում ադրբեջանական պատվիրակությունը մանրամասն տեղեկացվել է կենտրոնի պատմության և գործունեության վերաբերյալ։

Այնուհետև պատվիրակությունն այցելել է «Դելտա» գիտական ռազմատեխնիկական կենտրոն։ Ուսումնասիրվել է կենտրոնի կողմից արտադրված ռազմական տեխնիկան և սարքավորումները, կարծիքներ են փոխանակվել երկկողմ հետաքրքրություն ներկայացնող ռազմատեխնիկական համագործակցության մի շարք հարցերի շուրջ։