Ադրբեջանի ԱԳՆ. Հայաստանը խոչընդոտում է խաղաղությանը փաստերի շահարկումով

Հայկական կողմը, փոխանակ փորձի վերացնել այն խնդիրները, որոնք խանգարում են Ադրբեջանի հետ խաղաղության պայմանագրի ստորագրմանը, զբաղվում է մանիպուլյացիաներով՝ փորձելով Ադրբեջանին ներկայացնել որպես խաղաղությամբ չշահագրգռված երկիր։

Ինչպես հայտնում է Caliber.Az-ը, այս մասին հայտարարել է Ադրբեջանի ԱԳՆ մամուլի քարտուղար Այխան Հաջիզադեն՝ մեկնաբանելով Հայաստանի արտաքին գործերի նախարար Արարատ Միրզոյանի՝ Բրազիլիայի ԱԳՆ ղեկավար Մաուրո Վիեյրայի հետ համատեղ ասուլիսում արված հայտարարությունները։

Հաջիզադեն հիշեցրել է, որ հենց Հայաստանն է նախաձեռնել Ադրբեջանի դեմ ագրեսիվ պատերազմը, էթնիկ զտումների է ենթարկել բոլոր ադրբեջանցիներին իր տարածքում և ադրբեջանական հողերում, որոնք օկուպացման տակ է պահել շուրջ 30 տարի։

«Ադրբեջանը երբեք օկուպացիոն քաղաքականություն չի վարել Հայաստանի նկատմամբ և շահագրգռված չի եղել այնպիսի իրավիճակի ստեղծմամբ, որը տարածաշրջանը կվերածի առճակատման գոտու։ Անգամ նախարար Միրզոյանի այն հայտարարությունը, թե Հայաստանը համաձայնել է ընդունել խաղաղ պայմանագրի նախագծի վերջին տարբերակը և ճանապարհ է բացել բանակցությունների ավարտին, վկայում է այն մասին, որ այս երկիրը վերջին երկուսուկես տարիների ընթացքում խոչընդոտել է գործընթացին։ Հենց ադրբեջանական դիվանագիտությունն ու մեր ձեռնարկած միջոցները թույլ տվեցին ավարտին հասցնել բանակցությունները խաղաղության պայմանագրի տեքստի շուրջ»,- նշել է Հաջիզադեն։