Ադրբեջանի և Թուրքիայի համատեղ զորավարժությունների փորձը կարող է կիրառվել նաև այլ թյուրքալեզու պետություններում. Ջավիդ Վելիև

Ռազմական համագործակցության ամրապնդման հարցը կդառնա առաջնահերթություններից մեկը 2026 թվականին Թյուրքալեզու պետությունների կազմակերպությունում (ԹՊԿ) Ադրբեջանի նախագահության ընթացքում։

Այս մասին Անկարայում «Ադրբեջանի նախագահությունը ԹՊԿ-ում և թյուրքալեզու աշխարհի ապագան» թեմայով պանելային քննարկումներից հետո ասել է Միջազգային հարաբերությունների վերլուծության կենտրոնի խորհրդի անդամ Ջավիդ Վելիևը, տեղեկացնում է Сaliber.Az-ը։

«ԹՊԿ-ի համագործակցության առաջնահերթ ուղղությունների շարքում արդիական է «թյուրքական աշխարհի համատեղ բանակի» գաղափարը, և Ադրբեջանը 2026 թվականին կազմակերպությունում իր նախագահության ընթացքում ուշադրություն կդարձնի նաև պաշտպանության և անվտանգության ոլորտներին», - նշել է նա։

Վելիևը հայտարարել է, որ Ադրբեջանի և Թուրքիայի միջև համատեղ զորավարժությունների անցկացման փորձը կարող է կիրառվել նաև այլ թյուրքալեզու պետություններում.

«2013 թվականից ի վեր Թուրքիան և Ադրբեջանը համատեղ զորավարժություններ են անցկացնում: Միայն անցյալ տարի Թուրքիայի հետ համատեղ անցկացվել է 25 զորավարժություն: Մենք ցանկանում ենք, որ այս փորձը կիրառվի նաև ԹՊԿ շրջանակներում»: