Ադրբեջանն ու Իտալիան քննարկել են միջխորհրդարանական հարաբերությունները

Ադրբեջանի Միլլի Մեջլիսի նախագահ Սահիբա Գաֆարովան հանդիպել է Իտալիայի դեսպան Լուկա դի Ջանֆրանչեսկոյի հետ։

Խորհրդարանի հաղորդագրության մեջ նշվում է, որ կողմերը գոհունակություն են հայտնել Ադրբեջանի և Իտալիայի միջև հարաբերությունների ներկա վիճակից, տեղեկացնում է Сaliber.Az-ը։

Նշվել է, որ էներգետիկ և տնտեսական ոլորտներում երկու երկրների հաջող համագործակցությունը նոր հնարավորություններ է բացում այլ ոլորտներում փոխգործակցության համար:

Հանդիպմանը հատուկ ուշադրություն է դարձվել միջխորհրդարանական հարաբերությունների զարգացմանը, որոնք նպաստում են համանման արժեքներ կրող ժողովուրդների միջև հարաբերությունների ամրապնդմանը։ Սահիբա Գաֆարովան ընդգծել է փոխայցելությունների կարևորությունը՝ հիշեցնելով իր պաշտոնական այցը Իտալիա, որը, ըստ նրա, կարևոր դեր է խաղացել գործընկերության խորացման գործում։

Նա նաև նշել է իտալացի խորհրդարանականների մասնակցությունը որպես դիտորդ 2024 թվականին Ադրբեջանում կայացած նախագահական և խորհրդարանական ընտրություններին, ինչպես նաև նրանց ներկայությունը Բաքվում անցկացված COP29 խորհրդարանական հանդիպմանը։