Ադրբեջանն ու Ուզբեկստանը քննարկել են համագործակցությունը ռազմական և քաղաքական սպառնալիքների ֆոնին

Դեկտեմբերի 10-ին Ադրբեջանի Անվտանգության խորհրդի քարտուղար Ռամիլ Ուսուբովը Բաքվում հանդիպել է իր ուզբեկ գործընկեր Վիկտոր Մահմուդովի հետ։

Caliber.az-ի փոխանցմամբ՝ հանդիպմանը նշվել է համագործակցության կարևորությունը աճող համաշխարհային դիմակայությունների, ռազմական և քաղաքական մարտահրավերների և սպառնալիքների ֆոնին։ Ընդգծվել է, որ նախագահներ Իլհամ Ալիևի և Շավքաթ Միրզիյոևի քաղաքական կամքին համապատասխան՝ Ադրբեջանն ու Ուզբեկստանը զարգացնում են ռազմավարական գործընկերությունը և արդյունավետ համագործակցությունը տարբեր ուղղություններով։

Կողմերն ընդգծել են ռազմական և ռազմատեխնիկական ոլորտներում կապերի հետագա ամրապնդման և ընդլայնման կարևորությունը՝ վստահություն հայտնելով, որ դա կբացի նոր հնարավորություններ Հարավային Կովկասում և Կենտրոնական Ասիայում կայունության և անվտանգության ապահովման համար։