Ադրբեջանը շարունակում է հավատալ ԵԱՀԿ-ի դերին. ԱԳՆ ղեկավար

Ադրբեջանը վերահաստատում է իր հանձնառությունը ԵԱՀԿ-ի շրջանակներում կառուցողական փոխգործակցությանը, չնայած կազմակերպության աշխատանքում առկա թերություններին։

Report-ի փոխանցմամբ՝ այս մասին հայտարարել է Ադրբեջանի արտաքին գործերի նախարար Ջեյհուն Բայրամովը՝ հինգշաբթի Վիեննայում կայացած ԵԱՀԿ 32-րդ նախարարական խորհրդի նիստում։

«Մենք շարունակում ենք հավատալ ԵԱՀԿ-ի դերին՝ շնորհիվ անվտանգության համապարփակ հայեցակարգի և երկրների լայն մասնակցության», - ասել է նախարարը։

Միևնույն ժամանակ, նշել է Բայրամովը, արդիականության պահպանման համար կազմակերպությունը պետք է հարմարվի և ցուցադրի իր գործունեության շոշափելի արդյունքներ։

Արտգործնախարարն ընդգծել է, որ միայն համատեղ որոշումները կարող են իրական արդյունքներ տալ։

«Կոնսենսուսի սկզբունքը միշտ պետք է մնա մեր կոլեկտիվ ջանքերի հիմնարար առանձնահատկությունը և որոշումների կայացման գործընթացի անկյունաքարը։ Այս հասկացողությամբ մենք բաց ենք մնում ԵԱՀԿ բոլոր մասնակից պետությունների հետ կառուցողական փոխգործակցության համար՝ կազմակերպության ֆունկցիոնալության և արդյունավետության մարտահրավերները լուծելու համար», - եզրափակել է նախարարը։