Ալեն Բերսեն բարձր է գնահատել իր հանդիպումը Ադրբեջանի նախագահի հետ

Ադրբեջանն ու Հայաստանը զգալի առաջընթաց են գրանցել խաղաղության գործընթացում։
 
Այս մասին Report-ին հայտարարել է Եվրոպայի խորհրդի գլխավոր քարտուղար Ալեն Բերսեն։
 
Նրա խոսքով՝ օգոստոսի 8-ին Վաշինգտոնում նախաստորագրված խաղաղության համաձայնագիրը, որը կնքվել է Ադրբեջանի և Հայաստանի ղեկավարների մասնակցությամբ և ԱՄՆ նախագահի վկայությամբ, բացառիկ նշանակություն ունի ոչ միայն երկու երկրների ժողովուրդների, այլև ամբողջ տարածաշրջանի համար. «Հաշվի առնելով այս խաղաղության գործընթացում տեղի ունեցող ամեն ինչ, կարող եմ ասել, որ սա շատ դրական զարգացում է, և մենք անկեղծորեն ուրախ ենք տեսնել այս առաջընթացը։ Մենք, իհարկե, ուշադիր հետևում ենք Վաշինգտոնում տեղի ունեցող իրադարձություններին։ Ինչպես հայտնի է, Եվրոպայի խորհուրդը տարիներ շարունակ աշխատել է բոլոր անդամ պետությունների հետ, այդ թվում՝ Ադրբեջանի և Հայաստանի։ Սա նշանակում է, որ Եվրոպայի խորհուրդը երկրների միջև  մշտական երկխոսության համար ճիշտ հարթակ է։ Երկխոսության հնարավորություն գոյություն ունի, և այդ պատճառով մենք միշտ վճռականորեն աջակցել ենք այս խաղաղության գործընթացին։ Ես անձամբ  մշտական կապ եմ պահպանում նախագահ Իլհամ Ալիևի հետ»։
 
Գլխավոր քարտուղարը բարձր է գնահատել իր հանդիպումը Ադրբեջանի նախագահի հետ Նյու Յորքում ՄԱԿ-ի կենտրոնակայանում՝ Բարձր մակարդակի շաբաթվա ընթացքում. «Մենք շատ հաջող հանդիպում ունեցանք, որի ընթացքում քննարկեցինք խաղաղության գործընթացի հարցերը։ Ես նաև կապի մեջ եմ Հայաստանի վարչապետի հետ։ Սա կարևոր է առաջընթացի հասնելու, մեր ընդհանուր հեռանկարները հասկանալու և համագործակցության զարգացման ուղիները որոշելու համար։ Ադրբեջանի և Հայաստանի կողմից աջակցվող խաղաղության նվաճումները մեծ հաջողություն են։ Մենք պետք է ոչ միայն բարձր գնահատնենք դրանք, այլև դրանք դիտարկենք որպես համագործակցության ընդլայնման նոր հնարավորություններ։ Կայունությունը, խաղաղությունը և կանխատեսելիությունը  անմհրաժեշտ են այսօրվա աշխարհում, բայց շատ տեղերում դա  չի երևում։ Հետևաբար, մենք պետք է մասնակցենք այս գործընթացներին։ Ադրբեջանի և Հայաստանի միջև խաղաղության համաձայնագրի ստորագրումը և կապերի վերականգնումը իսկապես դրական են։ Սա նոր հեռանկարներ է բացում ավելի խորը համագործակցության համար»։