Ասադովը՝ ղազախական հացահատիկի Ադրբեջանի տարածքով Հայաստան փոխադրման մասին

Խաղաղության օրակարգի շուրջ Ադրբեջանի և Հայաստանի միջև ձեռք բերված պայմանավորվածությունները պատմական նշանակություն ունեն տարածաշրջանում կայուն համագործակցության ապահովման առումով։

Report-ի փոխանցմամբ՝ այս մասին հայտարարել է Ադրբեջանի վարչապետ Ալի Ասադովը Թբիլիսիի «Մետաքսի ճանապարհ» 5-րդ ֆորումի բացման ժամանակ:

Նրա խոսքով՝ տարածաշրջանում հաղորդակցությունների բացումը, այդ թվում՝ Ադրբեջանի հիմնական մասի միավորումը Նախչըվանի Ինքնավար Հանրապետության հետ, որը երկրի անբաժանելի մասն է կազմում, կծառայի տարածաշրջանի միջազգային բեռնափոխադրումների տարանցիկ հզորությունների ընդլայնմանը։

Վարչապետը վստահություն է հայտնել, որ օգոստոսի 8-ի վաշինգտոնյան պայմանավորվածությունների համաձայն տարածաշրջանում բացվող նոր երթուղին («Թրամփի երթուղի», TRIPP - խմբ.) կդառնա Միջին միջանցքի կարևոր մասերից մեկը և կնպաստի դրա դերի աճին համաշխարհային տրանսպորտային ցանցում։

Ասադովը նշել է, որ Ադրբեջանը շարունակում է ցուցադրել տարածաշրջանում համագործակցության և վստահության վերականգնման իր հանձնառությունը. «Ադրբեջանական կողմը զգալի ներդրում է ունեցել այս ուղղությամբ՝ վերացնելով Հայաստան բեռների տարանցման բոլոր սահմանափակումները, որոնք մնացել են օկուպացիայի շրջանից: Ղազախական հացահատիկի Ադրբեջանի տարածքով Հայաստան փոխադրումը այս ուղղությամբ առաջին գործնական քայլն է: Ինչպես նշել է Ադրբեջանի նախագահ Իլհամ Ալիևը, սա ցույց է տալիս, որ Ադրբեջանի և Հայաստանի միջև խաղաղությունը այլևս միայն թղթի վրա չէ, այլ նաև գործնականում»: