Բաքուն և Վաշինգտոնը քննարկել են համագործակցության հարցեր

Մայիսի 30-ին Ադրբեջանի արտաքին գործերի նախարար Ջեյհուն Բայրամովն ընդունել է ԱՄՆ պետքարտուղարի Եվրոպայի և Եվրասիայի հարցերով օգնականի տեղակալ Ջոշուա Հաքի գլխավորած պատվիրակությանը։

Ինչպես Caliber.Az-ին հայտնել են ԱԳՆ-ից, հանդիպմանը քննարկվել են Ադրբեջանի և ԱՄՆ-ի միջև երկկողմ և բազմակողմ համագործակցության հարցերը, ինչպես նաև Ադրբեջանի և Հայաստանի միջև հարաբերությունների կարգավորման գործընթացի ներկա վիճակը։

Կողմերը նշել են Ադրբեջանի և ԱՄՆ-ի միջև գործընկերության կարևորությունը մի շարք բնագավառներում, էներգետիկ անվտանգության և մի շարք այլ ոլորտներում օգտակար համագործակցությունը, երկկողմ հարաբերությունների զարգացման անհրաժեշտությունը փոխադարձ շահերի շրջանակներում։

Հանդիպմանը դիտարկվել են տարածաշրջանային էներգետիկ նախագծերը, այլընտրանքային էներգիայի ոլորտում ծրագրերը, տրանսպորտային և հաղորդակցության ուղիների հեռանկարները, ինչպես նաև Կենտրոնական Ասիայի երկրների հետ համագործակցությունը։

Ջեյհուն Բայրամովը հյուրերին տեղեկացրել է հետհակամարտային շրջանում տարածաշրջանում տիրող իրավիճակի, Ադրբեջանի և Հայաստանի միջև խաղաղության գործընթացի ներկա վիճակի և հեռանկարների, ինչպես նաև այս ուղղությամբ առկա խոչընդոտների մասին։