Բայրամով. Էներգետիկան կարևոր դեր է խաղում Բաքվի և Բրյուսելի հարաբերություններում

Ադրբեջանն արդեն տեսնում է օգոստոսի 8-ին Վաշինգտոնում կայացած գագաթնաժողովում ձեռք բերված պայմանավորվածությունների դրական արդյունքները:

Report-ի փոխանցմամբ՝ այս մասին հայտարարել է Ադրբեջանի արտաքին գործերի նախարար Ջեյհուն Բայրամովը իր էստոնացի գործընկեր Մարգուս Ցախկնայի հետ համատեղ մամուլի ասուլիսում։

Նախարարի խոսքով՝ դրական քայլերից մեկն էլ սեպտեմբերի 1-ին Մինսկի խմբի լուծարման գործընթացի սկիզբն էր։

«Մենք գիտենք, որ ԱՄՆ-ի և Հայաստանի միջև TRIPP նախագծի իրականացման վերաբերյալ բանակցությունները շարունակվում են։ Դրական տարրերի շարքում կարելի է նշել Ադրբեջանի որոշումը՝ թույլատրել բեռների տարանցումը դեպի Հայաստան իր տարածքով, մասնավորապես՝ Ղազախստանից հացահատիկի մատակարարումները», - ընդգծել է Բայրամովը։

Նախարարն ընդգծել է, որ էներգետիկան կարևոր դեր է խաղում Բաքվի և Բրյուսելի միջև հարաբերություններում։

«Ադրբեջանը սկսել է գազ մատակարարել եվրոպական շուկա 2020 թվականի վերջին։ Մենք գազ ենք արտահանում 14 երկիր, որոնցից 12-ը եվրոպական են, իսկ 8-ը՝ ԵՄ անդամ պետություններ։ Միաժամանակ, մենք մեծ ջանքեր ենք գործադրում կանաչ էներգիայի ոլորտում», - ասել է Ադրբեջանի արտգործնախարարը։