D-8 քարտուղարություն. Ադրբեջանն իր փորձը կբերի կազմակերպություն և կամրապնդի այն

D-8 տնտեսական համագործակցության կազմակերպությանը (Իսլամական ութնյակ) անդամակցելու Ադրբեջանի հայտը դեռ գտնվում է քննարկման փուլում։

Այս մասին Caliber.Az-ին հայտնել են D-8 քարտուղարությունում։

«Ադրբեջանը կարևոր երկիր է ազգերի համաշխարհային հանրության մեջ, ունի հզոր տնտեսական ցուցանիշներ: Հուսով ենք, որ Ադրբեջանն իր փորձն ու գիտելիքները կբերի կազմակերպությանը և կամրապնդի այն, երբ կազմակերպությունը վերջնական որոշում կայացնի երկրի դիմումի վերաբերյալ», հայտարարել են D-8 քարտուղարությունում:

Նշենք, որ հուլիսի վերջին Իրանի ԱԳ նախարար Հոսեյն Ամիր Աբդոլլահիանը, տեսակոնֆերանսի ձևաչափով Բանգլադեշում ելույթ ունենալով D-8 նախարարների խորհրդի 20-րդ նիստում, աջակցել էր D-8-ին անդամակցելու Ադրբեջանի դիմումին։

Նաև ավելի վաղ Թուրքիայի արտգործնախարար Մևլութ Չավուշօղլուն հայտարարել էր, որ Ադրբեջանը դիմել է D-8-ին անդամակցելու համար։

«Իսլամական ութնյակը» (D-8) համագործակցության զարգացման միջազգային կազմակերպություն է, որին մասնակցում են Բանգլադեշը, Եգիպտոսը, Նիգերիան, Ինդոնեզիան, Իրանը, Մալայզիան, Պակիստանը և Թուրքիան։ Կազմակերպության ստեղծման մասին որոշումը կայացվել է 1996 թվականի նոյեմբերին Ստամբուլի «Համագործակցություն զարգացման ոլորտում» համաժողովում։