Դեսպան. Ադրբեջան-Իրան սահմանին կբացվի հինգերորդ անցակետը

Առաջիկա ամիսներին Ադրբեջան-Իրան սահմանին կբացվի նոր անցակետ։

Այս մասին Report-ին հայտնել է Ադրբեջանում Իրանի դեսպան Մուջթաբա Դեմիրչիլուն Նախչըվան կատարած այցի ժամանակ։

Նա նշել է, որ Իրանի և Ադրբեջանի միջև ներկայումս գործում է չորս անցակետ՝ Աստարա, Բիլասուվար, Ջուլֆա և Շահթախթը-Փոլդաշտ։ «Հինգերորդ անցակետի բացումը կապված է Աղբենդ-Քյալալա շրջանում նոր կամրջի կառուցման հետ։ Այս ուղղությամբ աշխատանքները կավարտվեն ընթացիկ տարվա դեկտեմբերի վերջին։ Անցակետի ստեղծման նախապատրաստական աշխատանքները նույնպես ընթացքի մեջ են»։

Դիվանագետը նշել է, որ այս անցակետի և կամրջի շահագործման հանձնումը նոր հնարավորություններ կստեղծի Ադրբեջանի և Իրանի միջև տնտեսական հարաբերությունների հետագա ընդլայնման համար, ինչպես նաև կնպաստի Նախչըվանի կապերին Ադրբեջանի մյուս շրջանների հետ։