Հաջիև. Հարավային Կովկասի տարածաշրջանում շատ բան է արմատապես փոխվել PBS-ի տեսասյուժե

Ամերիկյան հանրային հեռարձակող PBS-ը ներկայացրել է տեսանյութ, որտեղ մանրամասն նկարագրվում է ԱՄՆ-ի փորձը Դոնալդ Թրամփի վարչակազմի օրոք՝ աջակցելու Հայաստանի և Ադրբեջանի միջև հակամարտության խաղաղ կարգավորմանը՝ տրանսպորտային միջանցքի ստեղծման մասին  նախագծի (TRIPP) միջոցով: Նախագիծը նախատեսում է՝ Ադրբեջանի մայրցամաքային մասը կապել Նախչըվանի հետ, ընդլայնել առևտրային ուղիները և տնտեսական համագործակցությունը ամերիկյան ընկերությունների մասնակցությամբ:
 
Ինչպես հաղորդում է Caliber.Az-ը, սյուժեում ընդգծվում  է նախաձեռնության իրականացման դժվարությունները՝ Ռուսաստանի ազդեցությունը, Իրանի մոտիկությունը, տեխնիկական և քաղաքական ռիսկերը, և նշվում է, որ հաջողության դեպքում նախագիծը կարող է փոխել ուժերի հավասարակշռությունը Հարավային Կովկասում՝ թուլացնելով Ռուսաստանի դիրքերը և ամրապնդելով ԱՄՆ դերը
 
Սյուժեում Ադրբեջանի նախագահի օգնական, նախագահի աշխատակազմի արտաքին քաղաքականության  հարցերի բաժնի ղեկավար Հիքմեթ Հաջիևը ընդգծել է «Թրամփի երթուղու» հնարավորությունները:
 
«Ամերիկյան ընկերությունները և ԱՄՆ մասնավոր հատվածը հսկայական հնարավորություն կստանան օգտագործելու այս երթուղին՝ Կենտրոնական Ասիայի շուկաներ մուտք գործելու համար, ներառյալ հազվագյուտ հողային նյութերը և բիզնեսի այլ տեսակներ: Սա բոլորի համար «շահեկան» իրավիճակ է, այդ թվում՝ ամերիկյան ընկերությունների համար», - ասել է նա։
 
Հաջիևը նաև մեկնաբանել է Հարավային Կովկասում խաղաղության հեռանկարները։
 
«Ես տարածաշրջանային պատմությունը բաժանում եմ երկու  փուլի՝ օգոստոսի 8-ից առաջ և օգոստոսի 8-ից հետո: Հարավային Կովկասի տարածաշրջանում շատ բան է արմատապես փոխվել: Անկախություն ձեռք բերելուց ի վեր Հայաստանն ու Ադրբեջանը գտնվում էին փաստացի պատերազմական վիճակում: Սակայն այժմ իրական խաղաղություն է հաստատվել տեղերում», - ասել է Հ.Հաջիևը։