Հասանովն ու Աքարը քննարկել են տարածաշրջանային անվտանգության հարցեր

Ադրբեջանի պաշտպանության նախարար, գեներալ-գնդապետ Զաքիր Հասանովն այսօր հանդիպել է Թուրքիայի Ազգային Մեծ Ժողովի պատգամավոր, Ազգային պաշտպանության խորհրդարանական հանձնաժողովի նախագահ, այդ երկրի ազգային պաշտպանության նախկին նախարար Հուլուսի Աքարի գլխավորած պատվիրակությանը։

Ինչպես Caliber.Az-ին հայտնել են պաշտպանության նախարարությունից, հանդիպմանը Զաքիր Հասանովն ընդգծել է, որ Ադրբեջանի և Թուրքիայի նախագահների անկեղծ հարաբերությունները մեծ դեր են խաղում երկու երկրների միջև բոլոր ոլորտներում, այդ թվում՝ ռազմական կապերի զարգացման գործում։

Հուլուսի Աքարը նշել է փոխայցելությունների կարևորությունը և ընդգծել՝ Ադրբեջանի և Թուրքիայի միջև ռազմական կապերը, որոնք հասել են ռազմավարական դաշինքի մակարդակի, մշտապես զարգանում են։

Հանդիպմանը մտքերի լայն փոխանակություն է տեղի ունեցել փոխադարձ հետաքրքրություն ներկայացնող հարցերի, այդ թվում՝ տարածաշրջանային անվտանգության հարցերի շուրջ։