Ջևիզչի. Մենք կցանկանայինք Իրաքում Ղարաբաղի համալսարանի մասնաճյուղ բացել

Թուրքիան և Ադրբեջանը ամրապնդում են իրենց դիրքերը Սիրիայում, Իրաքում և Մերձավոր Արևելքում՝ դառնալով տարածաշրջանի առանցքային ուժերից մեկը։

Caliber.Az-ի փոխանցմամբ՝ այս մասին Բաքվում «Թուրքմենական ժառանգություն. քաղաքացիական հասարակությունների համերաշխություն» թեմայով ֆորումի շրջանակներում կազմակերպված պանելային քննարկման ժամանակ ասել է Սիրիայի թուրքմենական ասոցիացիաների ֆեդերացիայի նախագահ Թարիք Սուլո Ջևիզչին։

Ջևիզչին ընդգծել է, որ Սիրիայի թուրքմեններն ու ադրբեջանցի ժողովուրդն ունեն ընդհանուր ծագում, մշակույթ և ժառանգություն։ «Սիրիայի թուրքմենները միշտ աջակցել են Ադրբեջանին ազատության համար պայքարում, այդ թվում՝ ղարաբաղյան պատերազմի ժամանակ։ Համատեղ մեդիա նախագծերի զարգացումը և տնտեսական համագործակցությունն էլ ավելի կամրապնդեն մեր միասնությունը»,- ասել է նա։

Թուրքմեն գիտնականների կազմակերպության նախագահ Նեբիլ Շահին Քիֆրիլին նշել է, որ բուհերի և մշակութային կենտրոնների միջև համագործակցության զարգացումը կարող է ամրապնդել երկրների միջև կապերը։