Ադրբեջանի ԱԳՆ-ն՝ Դուդայի «հեռադիտակային շոուի» մասին «Սա հանգեցնում է հարաբերությունների սրման»

Ադրբեջանի արտաքին գործերի նախարարությունն արձագանքել է Լեհաստանի նախագահ Անջեյ Դուդայի այցին հայ-ադրբեջանական պայմանական սահման։

Ինչպես հայտնում է Caliber.Az-ը, ԱԳՆ-ն իր պատասխանն է հրապարակել X սոցիալական ցանցի իր էջում։

«Լեհաստանի նախագահ Անջեյ Դուդայի այցը հայ-ադրբեջանական սահման՝ Հայաստանում ԵՄ առաքելության (EUMA) անդամների ուղեկցությամբ, ցավոք, ԵՄ անդամ տարբեր երկրների և եվրոպական կառույցների հակաադրբեջանական քաղաքականության հերթական ցուցադրությունն է։

Մենք խորապես ցավում ենք, որ մի երկրի նախագահը, որը պաշտոնապես Ադրբեջանի «ռազմավարական գործընկերն» է, մասնակցել է անընդունելի դիվանագիտական «հեռադիտակային շոուին», ինչը տանում է դեպի Ադրբեջանի և Լեհաստանի միջև հարաբերությունների սրման:

Չնայած Ադրբեջանի պաշտոնատար անձանց կողմից Լեհաստանի նախագահի աշխատակազմին և արտաքին գործերի նախարարությանը ուղարկված բազմաթիվ ուղերձներին, լեհական կողմը չկարողացավ դիմակայել այս սադրիչ քայլին։

Ադրբեջանն իրեն իրավունք է վերապահում համապատասխան դիվանագիտական միջոցներ ձեռնարկել այս ոչ բարեկամական քայլի դեմ»,- ասվում է հրապարակման մեջ։