Արաղչի. Երրորդ ուժերը չպետք է վնասեն Բաքվի և Թեհրանի միջև հարաբերություններին

«3+3» տարածաշրջանային համագործակցության ձևաչափը կարևոր դեր է խաղում՝ Հարավային Կովկասում խաղաղության և կայունության ապահովման գործում։
 
Report-ի  հաղորդմամբ, այս մասին հայտարարել է Իրանի արտաքին գործերի նախարար Աբբաս Արաղչին՝ Բաքվում իր ադրբեջանցի գործընկեր Ջեյհուն Բայրամովի հետ համատեղ մամուլի ասուլիսի ժամանակ։
 
Իրանցի դիվանագետի խոսքով՝ Ադրբեջանի և Իրանի միջև համագործակցությունը կշարունակի ամրապնդվել նաև ապագայում։
 
«Այսօր  իմ ադրբեջանցի գործընկերոջ հետ  առարկայական բանակցություններ ենք վարել՝ Հարավային Կովկասի տարածաշրջանի և «3+3» ձևաչափի վերաբերյալ։ Այս ձևաչափը չափազանց կարևոր դեր է խաղում՝ տարածաշրջանում խաղաղության և կայունության ամրապնդման գործում», - հավելել է նա։
 
Արաղչին նաև ընդգծել է Իրանի շահագրգռվածությունը՝ Ադրբեջանի հետ հարաբերությունները ամենաբարձր մակարդակով պահպանելու հարցում։
«Մենք նմանատիպ ցանկություն ենք տեսնում նաև Ադրբեջանի կողմից։ Համոզված եմ, որ այդ հարաբերությունները կշարունակեն զարգանալ։ Մենք չպետք է թույլ տանք, որ որևէ երրորդ  ուժ վնասի մեր երկկողմ հարաբերություններին», - հավելել է նա։