ԵԱԿ. Ադրբեջանը Հայաստանից կառուցողական մոտեցում է ակնկալում խաղաղ գործընթացում

«Ենի Ազերբայջան» կուսակցության (ԵԱԿ) փոխնախագահ, կուսակցության կենտրոնական գրասենյակի ղեկավար Թահիր Բուդագովը մասնակցել է՝ Ասիական քաղաքական կուսակցությունների միջազգային համաժողովի (ICAP) 12-րդ Գլխավոր ասամբլեայի բացման արարողությանը՝ «Խաղաղության և հաշտության որոնում» թեմայով։
 
Ինչպես տեղեկացնում է Report-ը, միջոցառումը Պնոմպենում կազմակերպել է Կամբոջայի ժողովրդական կուսակցությունը։
 
Ելույթի սկզբում Թ.Բուդագովը ընթերցել է՝ Ադրբեջանի նախագահ Իլհամ Ալիևի ուղերձը միջոցառման մասնակիցներին։
 
Նրա խոսքով, ժամանակակից աշխարհում տեղի են ունենում շատ բարդ գործընթացներ և արագ փոփոխություններ. «Քաղաքական կատակլիզմները, որոնք ուղեկցվում են ճգնաժամերով և առճակատումներով, ազդում են բազմաթիվ երկրների վրա։ Նման բարդ իրավիճակում, երբ մենք ընդհարվում ենք նոր մարտահրավերների, խաղաղության և հաշտեցման որոնումը դարձել է բացարձակ անհրաժեշտություն։ Այսօր Ադրբեջանում տարբեր ազգերի ներկայացուցիչներ ապրում են խաղաղության, հանգստության և բարեկամության պայմաններում»։
 
Նա ընդգծել է, որ Ադրբեջանի կողմից ստեղծված իրողությունների հիման վրա Հարավային Կովկասում խաղաղության օրակարգ է սահմանվել. «Ադրբեջանի և Հայաստանի միջև խաղաղության պայմանագրի ստորագրումը, ներառյալ սահմանների սահմանազատումը և սահմանագծումը, հաղորդակցությունների վերականգնումը միջազգային հանրության ուշադրության կենտրոնում են՝ որպես այս օրակարգի կարևոր մաս: Ադրբեջանը խաղաղ գործընթացի շրջանակներում քաղաքական կամք է դրսևորել, հանդես է եկել  իրավական նորմերի վրա հիմնված՝ հինգ հիմնարար սկզբունքների հիման վրա համապատասխան առաջարկներով, և Հայաստանից ակնկալում է նույն կառուցողական մոտեցումը»։