Էրդողանը՝ Ալիևի հետ հանդիպումից հետո. Մենք վճռական ենք համատեղ նախագծեր իրականացնելու հարցում

Թուրքիայի նախագահ Ռեջեփ Թայիբ Էրդողանը կիսվել է՝ Ադրբեջանի ղեկավար Իլհամ Ալիևի հետ հանդիպումից ստացած տպավորություններով։
 
Ինչպես հայտնում է Caliber.Az-ը, համապատասխան հրապարակումը տեղադրվել է Х սոցիալական ցանցում Թուրքիայի ղեկավարի էջում:
 
«Ես շատ ուրախ էի ողջունել իմ եղբորը՝ Ադրբեջանի նախագահ Իլհամ Ալիևին, Թուրքիայում։ Մենք մեծ առաջընթաց ենք գրանցում մեր եղբայրական հարաբերությունների բոլոր բնագավառներում, որոնք մարմնավորված են՝ «Մեկ ազգ, երկու պետություն» կարգախոսով։ Մեր երկրների միջև հարաբերությունները մշտապես զարգանում են բազմաթիվ ոլորտներում՝ պաշտպանությունից մինչև առևտուր», - նշել է Էրդողանը։
 
Նա նաև ընդգծել է, որ այս համագործակցության առաջնագծում էներգետիկ ոլորտն է։
 
Թուրքիայի ղեկավարը հավելել է, որ Բաքուն և Անկարան միայն խաղաղություն և համագործակցություն են ուզում.
 
«Ցանկանում եմ նշել հետևյալը. Թուրքիան և Ադրբեջանը հանդես են գալիս խաղաղության, անվտանգության և բարգավաճման օգտին: Մենք միայն խաղաղություն ենք ուզում մեր տարածաշրջանում, ուզում ենք համագործակցություն, ուզում ենք միասին զարգանալ։ Այսուհետ մենք վճռական ենք համատեղ իրականացնելու բոլոր տեսակի նախագծեր, որոնք ուղղված են տարածաշրջանային խաղաղությանը, բարգավաճմանը և անվտանգությանը»։