Հիքմեթ Հաջիև. Ադրբեջանի և Հայաստանի միջև խաղաղություն արդեն գոյություն ունի, բայց մնում է վերջին քայլը

Ադրբեջանի նախագահի օգնական,  նախագահի աշխատակազմի արտաքին քաղաքականության հարցերով  բաժնի ղեկավար Հիքմեթ Հաջիևը՝ սլովակյան «Hospodárske noviny» հրատարակությանը տված հարցազրույցում հայտարարել է, որ Բաքվի և Երևանի միջև պատերազմն ավարտվել է, և տարածաշրջանում հաստատվել է նոր ստատուս քվո։
 
«Նախ և առաջ ուզում եմ ընդգծել. Հայաստանի և Ադրբեջանի միջև խաղաղություն արդեն գոյություն ունի։ Պատերազմն ավարտվել է։ Եթե նայեք մեր սահմաններին, կտեսնեք խաղաղություն և կայունություն։ Ավելին, կասեի, որ տարածաշրջանում ի հայտ է եկել նոր ստատուս քվո՝ հիմնված օրինականության և լեգիտիմության վրա։ Ցավոք, նախորդ ստատուս քվոն հիմնված էր հայկական կողմից ադրբեջանական տարածքների ռազմական օկուպացիայի փաստի վրա։ Սակայն այս էջն արդեն շրջված է։ Մենք նայում ենք դեպի ապագա։ «Խաղաղության համաձայնագրի տեքստը համաձայնեցված է», - նշել է Հաջիևը։
 
Պատասխանելով Ղարաբաղում դե ֆակտո և դե յուրե խաղաղության մասին պարզաբանող հարցին, նա բացատրել է. «Ամեն ինչ մի փոքր ավելի բարդ է։ Թղթի վրա կարելի է խաղաղություն ունենալ, բայց տեղում իրավիճակը կարող է տարբեր լինել։ Հիմա մենք ունենք հակառակ իրավիճակը։ Տեղում խաղաղություն է, հայ-ադրբեջանական սահմանը կայուն է, Ղարաբաղը այլևս քննարկման առարկա չէ։ Հայկական օկուպացիոն ուժերը լիովին դուրս են բերվել բոլոր ադրբեջանական տարածքներից։ Բայց որպեսզի խաղաղության համաձայնագիրը վերջապես ուժի մեջ մտնի, անհրաժեշտ է մեկ վերջին քայլ»։
 
Հաջիևը, ինչպես հաղորդում է Caliber.Az-ը, ընդգծել է, որ հարցը վերաբերում է Հայաստանի սահմանադրության փոփոխություններին. «Մենք ակնկալում ենք, որ Հայաստանը փոփոխություններ կկատարի իր սահմանադրության մեջ, որը դեռևս պարունակում է Ադրբեջանի նկատմամբ տարածքային պահանջների վերաբերյալ դրույթներ»։
 
Միևնույն ժամանակ, նա նշել է երկկողմ երկխոսությունում դրական փոփոխությունները. «Մենք ունենք երկկողմ   կապի ուղի Հայաստանի հետ։ Մենք խնդրահարույց հարցերը քննարկում ենք ուղղակիորեն՝ առանց որևէ միջնորդի։ Եվ մեր օրակարգում կան մի քանի իսկապես կարևոր թեմաներ։ Հիմնական կետը մնում է այն, որ ռազմական բախման տարրերը լիովին բացառված են մեր օրակարգից։ Այո, մեր միջև դեռևս վեճ կա, բայց հարևան երկրների միջև վեճերը նորմալ են։ Մենք դրանք տեսնում ենք նույնիսկ որոշ ԵՄ անդամների միջև։ Բայց վեճերը լուծելու համար գոյություն ունեն դիվանագիտությունն ու երկխոսությունը։ Մեզ հաջողվել է Հայաստանի հետ մեր հարաբերությունները ռազմական բախումից տեղափոխել քաղաքական վեճի վիճակի։ Եվ ես կարծում եմ, որ դա լավ նշան է»։