Ադրբեջանական ՈԿԿ-ները դիմել են Հարավային Կորեայի կառավարությանը

Ադրբեջանի ՈԿԿ-ների ազգային ֆորումը բաց նամակ է հղել Կորեայի Հանրապետության կառավարությանը։
 
Ինչպես հաղորդում է Oxu.Az-ը, նամակի հեղինակները նշում են, որ զարմացած և խորապես մտահոգված են հայ սցենարիստ և ռեժիսոր Էմիլի Մկրտչյանի՝ «There was, There was not» վերնագրով ֆիլմը Կորեայում ընթացող Չոնջուի միջազգային կինոփառատոնում ցուցադրելու թույլտվությամբ, քանի որ այս ֆիլմն ուղղված է Ադրբեջանի տարածքային ամբողջականության և ինքնիշխանության դեմ։
 
«Ֆիլմում Ադրբեջանի ինքնիշխան տարածքը, որը նախկինում գտնվում էր օկուպացիայի տակ, ներկայացված է հորինված անվան տակ, որը հակասում է պատմական արդարադատությանը, միջազգային իրավունքին և Կորեայի Հանրապետության պաշտոնական դիրքորոշմանը»։
 
Մենք խստորեն դատապարտում ենք Չոնջուի միջազգային կինոփառատոնի վերածումը էժան գործիքի՝ օկուպացիա, անջատողականություն, ծայրահեղականություն, էթնիկ և կրոնական ատելություն ու ռևանշիզմ քարոզող ֆիլմի տարածման համար։
 
«Ադրբեջանի ՈԿԿ-ների ազգային ֆորումը կոչ է անում փառատոնի ղեկավարությանը՝ հեռացնել այս ֆիլմը միջոցառման պաշտոնական էջից և կանխել նման դեպքերը ապագայում», - ասվում է նամակում։