Ադրբեջանի ԱԳՆ-ն անհիմն է անվանել Միրզոյանի պնդումները

Ադրբեջանի ԱԳՆ-ն անհիմն է անվանել Հայաստանի արտգործնախարար Արարատ Միրզոյանի կողմից՝ իրանցի գործընկեր Աբբաս Արաղչիի հետ հանդիպման ժամանակ հնչեցված պնդումները։
 
Ինչպես հայտնում է Caliber.Az-ը, այս մասին ասված է՝ Ադրբեջանի ԱԳՆ պաշտոնական ներկայացուցիչ Այխան Հաջիզադեի մեկնաբանության մեջ։
 
«Մարտի 25-ին Իրանի արտգործնախարար Սեյեդ Աբբաս Արաղչիի հետ համատեղ ասուլիսում՝ Հայաստանի արտգործնախարար Արարատ Միրզոյանի այն պնդումները, թե իբր Ադրբեջանը նոր պայմաններ է առաջ քաշել՝ խաղաղության պայմանագրի տեքստի շուրջ համաձայնության գալուց հետո, լիովին անհիմն են», - ասվում է հայտարարության մեջ:
 
Նրա խոսքով, Հայաստանի արտգործնախարարը քաջատեղյակ է, որ վերջին երկուսուկես տարիների ընթացքում բանակցային գործընթացի կարևոր թեմաներից են՝ Հայաստանի սահմանադրության մեջ Ադրբեջանի տարածքային ամբողջականությանը ու ինքնիշխանությանը հակասող դրույթի վերացման պահանջը, ինչպես նաև Մինսկի խմբի պաշտոնական վերացումը։
 
«Ադրբեջանի դեմ Հայաստանի տարածքային պահանջների մասին փաստերը, որոնք արտացոլված են Սահմանադրության, Հայաստանի ազգային օրենսդրության մեջ, դատական հայցերով և քաղաքական հայտարարություններով հայկական կողմին ներկայացվել են դեռևս 2023 թվականի մայիսին՝ Վաշինգտոնում կայացած հանդիպման ժամանակ։ Երրորդ երկրները նույնպես լիովին տեղեկացված են այդ մասին:
 
Հաշվի առնելով վերը նշվածը, հայկական կողմի պնդումները, թե իբր Ադրբեջանը առաջին անգամ է առաջ քաշում այդ պայմանները՝ նպատակ ունեն մոլորեցնել միջազգային հանրությանը, և այդ մարտավարությունը որևէ արդյունք չի տա։ Եթե ​​հայկական կողմը շահագրգռված է խաղաղության համաձայնագրի ստորագրմամբ, ապա նա պետք է անհապաղ  փոփոխություններ կատարի իր Սահմանադրության մեջ՝ հրաժարվելով Ադրբեջանի նկատմամբ տարածքային պահանջներից և չխուսափի՝ Մինսկի խմբի պաշտոնական վերացման ուղղությամբ համագործակցությունից»,- հայտարարել է Այխան Հաջիզադեն։