Ադրբեջանը Հաագայի արբիտրաժային դատարան հայց է ներկայացրել ընդդեմ Հայաստանի՝ կապված Բեռնի կոնվենցիայի հետ

Փետրվարի 12-ին Ադրբեջանը Հաագայի Արբիտրաժային դատարանի կենտրոնակայանում հայցադիմում է ներկայացրել Հայաստանի դեմ արբիտրաժային գործով, որը հիմնված է 1979 թվականի «Եվրոպայի վայրի բնության և բնական միջավայրերի պահպանման մասին» կոնվենցիայի (Բեռնի կոնվենցիա) վրա:

Ինչպես Caliber.Az-ին հայտնել են արտաքին գործերի նախարարությունից, հայցի փաստաթղթում ներկայացված են Բեռնի կոնվենցիայով Հայաստանի կողմից ստանձնած պարտավորությունների բազմաթիվ խախտումներ։

«Ադրբեջանն իր տարածքներն ազատագրելուց հետո սարսափելի ապացույցներ հայտնաբերեց այն մասին, թե ինչպես է Հայաստանը ոչնչացրել շրջակա միջավայրն ու ապրելավայրերը աշխարհի կենսաբազմազանության ամենահարուստ տարածքներից մեկում: Հայաստանի գործողությունները անդառնալի ու լուրջ վնաս են հասցրել տարածաշրջանի կենդանական աշխարհին»։

Նշենք, որ 2023 թվականի հունվարի 18-ին Ադրբեջանը արբիտրաժային ծանուցում է ուղարկել Հայաստան՝ արբիտրաժային գործընթաց սկսելու համար։ 2023 թվականի սեպտեմբերի 15-ին հաստատվել է արբիտրաժային դատարանի կազմը, իսկ 2024 թվականի ապրիլի 12-ին Հաագայում տեղի է ունեցել Ադրբեջանի և Հայաստանի միջև առաջին պրոցեդուրային նիստը։

«Ադրբեջանն ընդդեմ Հայաստանի» հայցը առաջին միջպետական արբիտրաժային գործընթացն է Բեռնի կոնվենցիայի շրջանակներում: Ադրբեջանը Հայաստանից ամբողջական փոխհատուցում է պահանջում վայրի բնության և կենսամիջավայրի զանգվածային ոչնչացման համար։ Սա ներառում է փոխհատուցում բուսական և կենդանական աշխարհի հարյուրավոր տեսակների, դրանց ապրելավայրերի ոչնչացման համար՝ լայնածավալ անտառահատումների, հանքարդյունաբերության և հիդրոէլեկտրակայանների կառուցման ժամանակ»,- հայտնել են ԱԳՆ-ում։