ԱԳՆ. 5 տարի առաջ Ադրբեջանի ԶՈՒ-երը դիմակայեցին պատմական անարդարությանը

Ադրբեջանի արտաքին գործերի նախարարությունը հայտարարություն է տարածել սեպտեմբերի 27-ի՝ Հիշատակի օրվա կապակցությամբ։
 
Caliber.Az-ի փոխանցմամբ՝ հայտարարության մեջ ասվում է.
 
«Այսօր լրանում է 44-օրյա Հայրենական պատերազմի սկսվելու հինգերորդ տարին, որը վերջ դրեց մեր երկրի դեմ ագրեսիային և ադրբեջանական հողերի 30-ամյա օկուպացիային։ Հինգ տարի առաջ հաղթանակած Գերագույն գլխավոր հրամանատարի ղեկավարությամբ՝ Ադրբեջանի փառահեղ Զինված ուժերը դիմակայեցին՝ պատմական անարդարությանը, ինքնիշխանության, տարածքային ամբողջականության և միջազգային իրավունքի կոպիտ խախտմանը։
 
Ի նշան՝ պատմության այս էջի հերոսների՝ մեր նահատակների հիշատակի նկատմամբ խորին հարգանքի՝ Ադրբեջանի Հանրապետության նախագահ Իլհամ Ալիևի հրամանագրով, սեպտեմբերի 27-ը մեր երկրում ամեն տարի նշվում է որպես Հիշատակի օր։ Այս օրը մենք հարգում ենք մեր ժողովրդի որդիների և դուստրերի հիշատակը, ովքեր իրենց կյանքը զոհաբերեցին երկրի տարածքային ամբողջականության և ինքնիշխանության համար,  առողջություն ենք մաղթում այս պատերազմի բոլոր վետերաններին։
 
Վերջին հինգ տարիների ընթացքում վերականգնման և խաղաղության ծրագրում հաջող առաջընթաց է գրանցվել։ Կյանքը վերադառնում է մեր ազատագրված հողեր, և ավերված քաղաքներն ու գյուղերը վերակառուցվում են նորագույն տեխնոլոգիաների միջոցով և միջազգային չափանիշներին համապատասխան։ Շարունակվում են ջանքերը՝ պայքարելու ականային սպառնալիքի դեմ և միջազգային հանրությանը տեղեկացնելու քաղաքացիների կյանքին ու առողջությանը սպառնացող ռիսկերի մասին։ Անհետ կորած անձանց ճակատագրերը պարզելու և մեր քաղաքացիների նկատմամբ մարդկության դեմ հանցագործություններ կատարած անձանց պատասխանատվության ենթարկելու ջանքերը՝ մնում են հետպատերազմյան ջանքերի անբաժանելի մասը։
 
Ադրբեջանի կողմից նախաձեռնված և խթանված երկկողմ խաղաղության գործընթացն արդեն արդյունքներ է տալիս: Օգոստոսի 8-ին Վաշինգտոնում կայացած պատմական գագաթնաժողովը, ԱՄՆ հովանու ներքո Ադրբեջանի և Հայաստանի միջև համատեղ հռչակագրի ստորագրումը, «Խաղաղության և Ադրբեջանի Հանրապետության և Հայաստանի Հանրապետության միջև միջպետական ​​հարաբերությունների հաստատման մասին համաձայնագրի» տեքստի նախաստորագրումը և ԵԱՀԿ Մինսկի խմբի և դրան առնչվող կառույցների լուծարման ուղղությամբ ձեռնարկված քայլերը կարևոր առաջընթաց են՝  շուրջ 30-ամյա հակամարտության էջը վերջնականապես շրջելու ուղղությամբ: