ՆԱՏՕ-ի գլխավոր քարտուղարի տեղակալ. Հարավային Կովկասը կարևոր նշանակություն ունի Դաշինքի համար

ՆԱՏՕ-ի գլխավոր քարտուղարի տեղակալ Ռադմիլա Շեկերինսկան մեկնաբանել է Ադրբեջանի խորհրդարանի խոսնակ Սահիբա Գաֆարովայի հետ իր հանդիպումը։

Ինչպես հաղորդում է Report-ը, այս մասին նա գրել է X սոցիալական ցանցի իր էջում։

Ըստ նրա՝ երկու կողմերը քննարկել են տարածաշրջանային անվտանգության հարցեր։

«Հանդիպեցի Ադրբեջանի խորհրդարանի խոսնակ Սահիբա Գաֆարովայի հետ։ Մենք քննարկեցինք տարածաշրջանային անվտանգության հարցեր և ՆԱՏՕ-ի ու Ադրբեջանի միջև հարաբերությունները։ Հարավային Կովկասը կարևոր նշանակություն ունի Դաշինքի համար», - նշել է Շեկերինսկան։

Ավելի վաղ Ադրբեջանի խորհրդարանի մամուլի և հասարակայնության հետ կապերի վարչությունը հայտնել է, որ Սահիբա Գաֆարովայի հանդիպումը Ռադմիլա Շեկերինսկայի գլխավորած ՆԱՏՕ-ի պատվիրակության հետ նվիրված էր երկկողմ համագործակցության ներկա վիճակին և հեռանկարներին։

Մամուլի հաղորդագրության մեջ ընդգծվել է Ադրբեջանի ավելի քան 30-ամյա գործընկերությունը ՆԱՏՕ-ի հետ, քաղաքական երկխոսության կարևորությունը և երկրի դերը որպես Դաշինքի հուսալի գործընկեր խաղաղապահ գործողություններում և էներգետիկ անվտանգության ոլորտում։