Կայա Կալասը շնորհակալություն է հայտնել Ադրբեջանին

Եվրամիությունը երախտագիտություն է հայտնել Ադրբեջանին՝ Իսրայելի և Իրանի միջև հակամարտության սրման գոտուց միության քաղաքացիների տարհանման գործում ցուցաբերած օգնության համար։
 
Ինչպես հաղորդում է Report-ը, այս մասին հայտարարել է ԵՄ արտաքին գործերի և անվտանգության քաղաքականության հարցերով գերագույն ներկայացուցիչ Կայա Կալասը՝ Հաագայում ՆԱՏՕ-ի գագաթնաժողովի շրջանակներում պատասխանելով ադրբեջանցի լրագրողների հարցերին։
 
 «Ես կապի մեջ եմ Ադրբեջանի արտգործնախարարի հետ՝ տարածաշրջանում լարվածության սրացումից ի վեր։ Ես նաև շնորհակալություն հայտնեցի նրան՝ մեր դիվանագետների և քաղաքացիների տարհանումը Ադրբեջանի միջոցով կազմակերպելու համար», - ասել է Կալլասը։
 
Նա նաև հայտնել է, որ իր ադրբեջանցի գործընկերոջ հետ քննարկել է՝ Իրանում պատերազմի հնարավոր հետևանքները Ադրբեջանի համար։ «Ես նկատի ունեմ, ի թիվս այլ բաների, Իրանից դեպի Ադրբեջան եկող միգրացիոն ճնշումը», - նշել է եվրոպական դիվանագիտության ղեկավարը։