ՄԱԿ-ի զարգացման ծրագիրն ընդլայնում է գործունեությունը Ղարաբաղում

ՄԱԿ-ի զարգացման ծրագիրը (UNDP) նախատեսում է ընդլայնել իր գործունեությունը Ադրբեջանի Ղարաբաղի շրջանում՝ կենտրոնանալով տնտեսական ուսուցման, ինքնազբաղվածության աջակցության և փոքր ու միջին բիզնեսի զարգացման վրա։

Այս մասին  Caliber.Az-ին ասել է Ադրբեջանում ծրագրի մշտական ներկայացուցիչ Ալեսանդրա Ռոկասալվոն։

Նրա խոսքով, ՄԱԶԾ-ն սերտորեն համագործակցում է Ադրբեջանի փախստականների և հարկադիր տեղահանվածների հետ աշխատանքի պետական կոմիտեի հետ:

«Մենք շատ բան ենք անում ականազերծման և հակաականային գործունեության, տուժածներին օգնություն ցուցաբերելու համար: Բայց ապագայում մենք հույս ունենք ընդլայնել մեր գործունեությունը տնտեսական ուսուցման, ինքնազբաղվածության և փոքր ու միջին բիզնեսի զարգացման ոլորտներում»,- նշել է նա։

Ռոկասալվոն նաև ընդգծել է, որ ինքը մի քանի անգամ այցելել է տարածաշրջան և տպավորված է վերականգնման աշխատանքների ընթացքով։

«Ես մի քանի անգամ եղել եմ Ղարաբաղում, ուստի սա իմ առաջին այցը չէ։ Յուրաքանչյուր տարածաշրջան տարբերվում է իր բնությամբ և հնարավորություններով: Ես հատկապես ուրախ եմ տեսնել լեռնային Քելբաջարը: Վերականգնողական աշխատանքները, կառուցված հիդրոէլեկտրակայանը և բնակելի համալիրը մեծ տպավորություն թողեցին ինձ վրա։ Հուսով եմ, որ առաջիկա տարիներին հնարավորինս շատ մարդիկ կվերադառնան այստեղ և կնպաստեն Ղարաբաղի տնտեսական վերականգնմանը»,- հավելել է նա։