Նոր մանրամասներ «Բաքու-Գրոզնի» ավիավթարի հետաքննության վերաբերյալ. Գլխավոր դատախազության հայտարարությունը

Ադրբեջանի Գլխավոր դատախազությունը հայտարարություն է տարածել՝ Embraer-190 ինքնաթիռի կործանման հետաքննության վերաբերյալ։

Դեկտեմբերի 25-ին Ակտաու քաղաքի մերձակայքում տեղի ունեցած՝ «Ադրբեջանական ավիաուղիներ» ՓԲԸ-ին պատկանող, Բաքվից Գրոզնի չվերթ իրականացնող՝ Embraer 190 ինքնաթիռի կործանման դեպքի առթիվ հարուցված քրեական գործի քննությունը շարունակվում է։ Այս մասին ասվում է՝ Ադրբեջանի Հանրապետության Գլխավոր դատախազության հաղորդագրության մեջ, հայտնում է Caliber.Az-ը։

Ադրբեջանի նախագահ Իլհամ Ալիևի հանձնարարությունների և ցուցումների հիման վրա՝ գլխավոր դատախազ Քյամրան Ալիևը դեպքի առաջին օրվանից ինտենսիվ կապեր է պահպանում՝ Ղազախստանի գլխավոր դատախազ Բերիկ Ասիլովի, Ռուսաստանի գլխավոր դատախազ Իգոր Կրասնովի, ՌԴ Քննչական կոմիտեի նախագահ Ալեքսանդրի Բաստրիկինի, ինչպես նաև  Բրազիլիայի գլխավոր դատախազ Պաուլո Գոնետի  հետ։

Միջաեպի բազմակողմանի, օբյեկտիվ և լրիվ հետազոտումն ապահովելու նպատակով՝ դեպքի վայրում իրականացվել են մեծածավալ քննչական գործողություններ՝ Ադրբեջանի, Ղազախստանի, Ռուսաստանի և Բրազիլիայի պրոֆեսիոնալ քննիչների և փորձագետների մասնակցությամբ։

Իր ղազախ գործընկեր Բերիկ Ասիլովի հետ քննարկումների ընթացքում Քյամրան Ալիևը մտքեր է փոխանակել ՝հավաքագրված ապացույցների ճիշտ իրավական գնահատման, հանցագործության վայրի զննության, առաջնային ապացույցների հավաքագրման և այլ կարևոր ասպեկտների վերաբերյալ։ Նա շնորհակալություն է հայտնել՝ համատեղ քննչական և դատավարական գործողություններ իրականացնելու, ինչպես նաև դեպքի բոլոր հանգամանքները պարզելու ուղղությամբ ցուցաբերված բազմակողմանի աջակցության համար։

Ադրբեջանի գլխավոր դատախազությունը պարբերաբար հանրությանը կտեղեկացնի հետաքննության ընթացքի մասին։