Ուկրաինայի ԱԳՆ ղեկավարը շնորհակալություն է հայտնել Ադրբեջանին Իրպենի վերականգնման հարցում ցուցաբերած օգնության համար

Սեպտեմբերի 10-ին հեռախոսազրույց է տեղի ունեցել Ադրբեջանի արտաքին գործերի նախարար Ջեյհուն Բայրամովի և Ուկրաինայի նորանշանակ արտաքին գործերի նախարար Անդրեյ Սիբիգայի միջև։

Ինչպես Caliber.Az-ին հայտնել են ԱԳՆ-ից, հեռախոսազրույցի ընթացքում քննարկվել են Ադրբեջանի և Ուկրաինայի միջև համագործակցության ընթացիկ օրակարգը, տարածաշրջանային և միջազգային անվտանգության հարցեր: Գոհունակություն է հայտնվել երկու երկրների միջև համագործակցության կապակցությամբ, որը հիմնված է փոխադարձ հարգանքի ու աջակցության, միջազգային իրավունքի նորմերի ու սկզբունքների վրա։

Անդրեյ Սիբիգան հույս է հայտնել, որ Ադրբեջանի և Ուկրաինայի միջև համագործակցությունը հետագայում էլ ավելի կամրապնդվի: Նա երախտագիտություն է հայտնել Ադրբեջանի կողմից ցուցաբերվող մարդասիրական օգնության համար, մասնավորապես Իրպեն քաղաքում ենթակառուցվածքների վերականգնման և վերակառուցման, ականազերծման համար:

Հեռախոսազրույցի ընթացքում մտքեր են փոխանակվել նաև փոխադարձ հետաքրքրություն ներկայացնող այլ հարցերի շուրջ։