«Սա նոր էկոլոգիական պատերազմ է Ադրբեջանի դեմ» Բնապահպանները՝ Ֆրանսիայի կողմից Հայաստանում ռադիոակտիվ թափոնների տեղակայման մասին

Environmental Protection First (EPF) կոալիցիան հայտարարություն է տարածել Ֆրանսիայի կողմից Հայաստանի և Ադրբեջանի պայմանական սահմանի մոտ ուրան պարունակող ռադիոակտիվ թափոնների տեղադրման կապակցությամբ։

Ինչպես հաղորդում է Report-ը, հայտարարության մեջ նշվում է, որ EPF անդամները ֆրանսիական պետական Orano ընկերության կողմից ուրան պարունակող ռադիոակտիվ թափոնների տեղադրումը պայմանական ադրբեջանա-հայաստանյան սահմանի մոտ համարում են Ադրբեջանի դեմ նոր բնապահպանական պատերազմ։

«Ֆրանսիական մամուլի տվյալներով՝ այս գործընթացը սկսվել է հունիսին, և միջուկային թափոնների առաջին մասն արդեն տեղադրվել է Հայաստանի Դիլիջանի ազգային պարկի տարածքում։ Պարկը գտնվում է Գյոյչա լճից հյուսիս՝ Աղստաֆա գետի ավազանում 1100-2800 մետր բարձրության վրա, և ջուրը Աղստաֆա գետով հոսում է դեպի Քուր։ Քանի որ պարկը գտնվում է Գեդաբեկի, Թովուզի, Աղստաֆայի և Ղազախի շրջանների մոտակայքում, Ադրբեջանի կենսաբազմազանությունը վտանգված է։

Ֆրանսիական մամուլի հետաքննությունները ցույց են տալիս, որ ուրան պարունակող ռադիոակտիվ թափոնների Հայաստան արտահանումը համաձայնեցվել է Մակրոնի և Փաշինյանի միջև այս տարվա փետրվարին Փարիզում կայացած հանդիպման ժամանակ, որից հետո ֆրանսիական ընկերության կողմից մեծ քանակությամբ կասկածելի նվիրատվություններ են փոխանցվել Փաշինյանի կնոջ՝ Աննա Հակոբյանի «Իմ քայլը» հիմնադրամի հաշվին՝ որպես պարգև այս գործարքի համար։ Հայաստանի իշխանությունները հերքում են ֆրանսիական լրատվամիջոցների հաղորդագրությունները, բայց միևնույն ժամանակ թույլ չեն տալիս տեղում ստուգել փաստը։

«Environmental Protection First» կոալիցիան կոչ է անում վարչապետ Նիկոլ Փաշինյանին ստեղծել պայմաններ Ադրբեջանի ՈԿԿ-ների կողմից՝ Ատոմային էներգիայի միջազգային գործակալության և այլ միջազգային կազմակերպությունների ներկայացուցիչների հետ համատեղ, Ադրբեջանի հետ Հայաստանի պայմանական սահմանին հարակից տարածքներում մոնիթորինգի իրականացման համար», - ասվում է հայտարարության մեջ։