ԹՊԿ գլխավոր քարտուղար. Ադրբեջանն առաջարկել է տիեզերական համագործակցության միասնական կանոններ

Ադրբեջանն առաջարկել է մշակել միասնական իրավական նորմեր՝ Թյուրքական պետությունների կազմակերպության (ԹՊԿ) շրջանակներում համատեղ տիեզերական գործունեությունը կարգավորելու համար։

Ինչպես տեղեկացնում է Caliber.Az-ը, այս մասին Բաքվում կայացած ԹՊԿ երկրների տիեզերական գործակալությունների 4-րդ հանդիպման ժամանակ ասել է ԹՊԿ գլխավոր քարտուղար Կուբանիչբեկ Օմուրալիևը։

«2024 թվականի նոյեմբերի 6-ին Բիշքեկում կայացած գագաթնաժողովում տիեզերական գործունեության ոլորտում փոխըմբռնման հուշագրի ստորագրումը դարձավ մեր համագործակցության ինստիտուցիոնալացման կարևոր փուլը: Որպես այս գործընթացի շարունակություն՝ ադրբեջանական կողմն առաջարկում է միասնական իրավական նորմեր մշակել համատեղ տիեզերական գործունեությունը կարգավորելու համար»,- նշել է Օմուրալիևը։

Նրա խոսքով, այս կարևոր նախաձեռնությունը կապահովի իրավական հստակություն, թափանցիկություն և համապատասխանություն միջազգային չափանիշներին։