Թուրք նախարար. անհետ կորածների հարցը միայն պատմական խնդիր չէ

Անհետ կորածների հարցը հիմնարար մարտահրավեր է, որը պահանջում է ամբողջ միջազգային հանրության համատեղ ջանքերը։

Այս մասին հայտարարել է Թուրքիայի արդարադատության փոխնախարար Խուրշիթ Յըլդըրըմը, տեղեկացնում է Caliber.Az-ը:

Յըլդըրըմն ընդգծել է անհետ կորածների հարցի գլոբալ և համամարդկային բնույթը. «Սա երրորդ անգամն է, որ Ադրբեջանն անցկացնում է անհետ կորածներին նվիրված համաժողով, և երկրի ղեկավարությունը մեծ նշանակություն է տալիս այս միջոցառմանը։ Թեման չափազանց կարևոր է. անհետ կորած կամ բռնի անհետացած անձանց գտնելը և նրանց ընտանիքներին հույս ներշնչելը մարդկության հիմնարար հարց է»։

Փոխնախարարը շեշտել է Ադրբեջանի ցավալի պատմական փորձը այս հարցում։

«Թուրքիան զգալի հաջողությունների է հասել այս ոլորտում, մասնավորապես՝ դատաբժշկական փորձաքննության ոլորտում։ Թուրքիայի փորձը այս ոլորտում բարձր միջազգային ճանաչում է ստացել, և մենք ձգտում ենք կիսվել մեր նվաճումներով։ Անհետ կորածների հարցը միայն պատմական խնդիր չէ։ Յուրաքանչյուր դեպքի հետևում թաքնված է իրական մարդկային ճակատագիր՝ ընտանիք, երեխաներ, մայրեր, հիշողություններ։ Կարևոր է գտնել այս մարդկանց, նույնիսկ եթե նրանք արդեն հեռացել են կյանքից, վերամիավորել նրանց իրենց ընտանիքների հետ և պարզել նրանց ինքնությունը ԴՆԹ թեստավորման միջոցով», - նշել է փոխնախարարը։