Զաքիր Հասանովը հետևել է Ադրբեջանի ԶՈւ զորավարժություններին

2025 թվականի պատրաստության պլանի համաձայն՝ ադրբեջանական բանակում մարտավարական զորավարժություններ են անցկացվել նոր օպերատիվ հայեցակարգի կիրառմամբ՝ հաշվի առնելով ժամանակակից մարտական մեթոդները և հարմարեցված իրական մարտական պայմաններին, հայտնում է Caliber.Az-ը՝ հղում անելով Ադրբեջանի ՊՆ պաշտոնական կայքին։

Մարտական կրակով զորավարժությունների ընթացքին հետևել են պաշտպանության նախարար գեներալ-գնդապետ Զաքիր Հասանովը և բարձրաստիճան այլ պաշտոնյաներ։

Պաշտպանության նախարարին զեկուցվել է, որ զորավարժություններին ներգրավված տարբեր նշանակության անօդաչու թռչող սարքերն իրականացնում են տարածքի հետախուզում և օպերատիվորեն մարտական կառավարման կենտրոն փոխանցում պայմանական հակառակորդի թիրախների տեղակայման և զրահատեխնիկայի տեղաշարժի մասին տվյալները։

Զորավարժությունների սցենարի համաձայն՝ նախքան հարձակմանը՝ հրետանային ստորաբաժանումները և ավիացիոն միջոցները հարվածներ են հասցրել պայմանական հակառակորդի կենտրոնացված ռեզերվներին և կենդանի ուժին և անցում ապահովել ականապատ դաշտերով։

Զորավարժությունների ընթացքում կատարվել են ուղղաթիռով անձնակազմի տարհանման, պայմանական հակառակորդի շարասյունը դարանելու և վնասազերծելու, հենակետերը գրավելու գործողություններ։