Ադրբեջանը 100 մլն դոլարի չափով օգնություն կտրամադրի եղբայրական Թուրքիային

Ադրբեջանի Հանրապետության արտաքին գործերի նախարար Ջեյհուն Բայրամովը մասնակցել է Բրյուսելում կայացած «Միասին հանուն Թուրքիայի և Սիրիայի ժողովուրդների» միջազգային դոնորների համաժողովին։

Caliber.Az-ի փոխանցմամբ՝ համաժողովը կազմակերպվել է Թուրքիայում և Սիրիայում տեղի ունեցած երկրաշարժի հետևանքների վերացման և տուժածներին աջակցության համար։

Ելույթ ունենալով համաժողովում՝ նախարար Ջեյհուն Բայրամովը նշել է, որ տվյալ միջոցառման կազմակերպումը, որի նպատակն է մոբիլիզացնել միջազգային հանրության ջանքերը սարսափելի աղետի հետևանքները վերացնելու համար, արժանի է գովասանքի։

«Ադրբեջանը կշարունակի լինել եղբայրական Թուրքիայի կողքին, մասնավորապես՝ մեր երկիրը կշարունակի նյութատեխնիկական աջակցություն ցուցաբերել երկրաշարժից հետո վերակառուցման և շինարարական աշխատանքներին։ Թուրքիայում վերականգնողական աշխատանքներին Ադրբեջանի Հանրապետության ներդրման ծրագրի շրջանակներում 100 մլն դոլար կծախսվի բնակելի շենքերի, սոցիալական օբյեկտների և ուսումնական հաստատությունների կառուցման համար», - ասել է նախարարը: