Ադրբեջանի դեսպանատունը բողոքի նոտա է փոխանցել ՌԴ ԱԳՆ-ին

ՌԴ-ում Ադրբեջանի դեսպանատունը բողոքի նոտա է հղել ՌԴ ԱԳՆ՝ 2023 թվականի օգոստոսի 7-ին Եկատերինբուրգում «թալիշ-մուղան ինքնավար հանրապետության կազմավորման 30-ամյակի»-ն նվիրված միջոցառման կազմակերպման կապակցությամբ։

Այս մասին հայտնում է Сaliber.Az-ը՝ հղում անելով Ադրբեջանի դեսպանատան կայքին։

«Ադրբեջանի Հանրապետության տարածքային ամբողջականության և ինքնիշխանության դեմ ուղղված այս միջոցառման անցկացման կապակցությամբ դեսպանությունը բողոքի նոտա է հղել ՌԴ ԱԳՆ-ին, իսկ դեսպան Փոլադ Բյուլբյուլ օղլուն Ադրբեջանի սկզբունքային դիրքորոշումը և վճռական դժգոհությունն արտացոլող նամակ է հասցեագրել Սվերդլովսկի մարզի նահանգապետ Եվգենի Կույվաշևին։ Սրան զուգահեռ Եկատերինբուրգում գործող Ադրբեջան-Ուրալ հասարակական ազգային-մշակութային կազմակերպության ղեկավար Շահին Շիխլինսկին դիմումներ է հղել քաղաքի համապատասխան վարչական մարմիններին։

Ռուսաստանյան կողմի ուշադրությանն է ներկայացվել, որ «նման սադրիչ բնույթի միջոցառման կազմակերպումը և դրան Եկատերինբուրգի քաղաքային դումայի նախագահի հյուրի կարգավիճակում մասնակցելն անընդունելի է, Ռուսաստանի իշխող կուսակցության ներկայացուցչի այս քայլն անջատողականություն է քարոզում, հիմնովին հակասում Ադրբեջանի և Ռուսաստանի միջև դաշնակցային փոխգործակցության ոգուն, ինչպես նաև վնասում երկկողմ համագործակցությանը», - ասվում է հաղորդագրության մեջ։