Ադրբեջանի հավաքականի բժիշկը ինքնաթիռում փրկել է երեխայի կյանքը

Թայական բռնցքամարտի Ադրբեջանի հավաքականի բժիշկ Դիլբար Սաֆարովան, ով թիմի հետ մեկնում էր Բելառուս՝ ԱՊՀ 2-րդ խաղերին, ինքնաթիռում փրկել է բելառուս երեխայի կյանքը։

Ինչպես հայտնում է Caliber.Az-ը, «Բելավիա» ավիաընկերության ինքնաթիռում երեխայի ինքնազգացողությունը հանկարծակի վատացել է։

Սաֆարովան, ով պարզվել է, որ ինքնաթիռում գտնվող միակ բուժաշխատողն է, ասել է, որ բուժօգնություն ցուցաբերելուց հետո երեխայի վիճակը կայունացել է.

«Բարձր ջերմությունից երեխայի մոտ ցնցումներ էին սկսվել։ Երեխային առաջին բուժօգնություն ցուցաբերեցի, սրսկում կատարեցի, որ ջերմաստիճանը իջնի»։

Ադրբեջանցի բժիշկը երեխային դուրս է բերել դեպքի հետ կապված արտակարգ վայրէջք կատարած ինքնաթիռից, հանձնել նրան սպասող շտապօգնության աշխատակիցներին, ապա վերադարձել ինքնաթիռ: