Ադրբեջանի ՊՆ. Շնորհավորում ենք մեր եղբայր Թուրքիայի Հաղթանակի 100-ամյակի առթիվ «Մեր երկրներն էլ ավելի մեծ հաղթանակներ են տանելու»

Ադրբեջանի պաշտպանության նախարարությունը շնորհավորել է Թուրքիային օգոստոսի 30-ին նշվող Հաղթանակի օրվա առթիվ, որը մարմնավորում է Անկախության պատերազմում տարած հաղթանակի 100-ամյակը։

Ինչպես Caliber.Az-ին հայտնել են ՊՆ մամուլի ծառայությունում, Թուրքիայի և Ադրբեջանի եղբայրական ժողովուրդները հանդիսավորությամբ և անսահման հպարտությամբ կնշեն արիության, հերոսության և հայրենիքի հանդեպ սիրո շնորհիվ ձեռք բերված այս հաղթանակի 100-ամյակը։

«Թուրք-ադրբեջանական հարաբերությունները, որոնք սկիզբ են առնում 1918 թվականի մայիսի 28-ին Ադրբեջանի Դեմոկրատական Հանրապետության անկախության հռչակմամբ, զարգանում են մեծ առաջնորդ Մուստաֆա Քեմալ Աթաթուրքի «Ադրբեջանի ուրախությունը մեր ուրախությունն է, վիշտը՝ մեր վիշտն է» և համազգային առաջնորդ Հեյդար Ալիևի «Մեկ ազգ, երկու պետություն» կարգախոսի ոգուն համապատասխան բոլոր ուղղություններով, այդ թվում՝ պաշտպանության ոլորտում։

Անվիճելի փաստ է, որ նախագահ Իլհամ Ալիևը և Թուրքիայի Հանրապետության նախագահ Ռեջեփ Թայիբ Էրդողանը բացառիկ դեր ունեն երկու եղբայրական երկրների միջև հարաբերությունների ներկա մակարդակին հասնելու գործում։

Ադրբեջանի հուսալի դաշնակից Թուրքիայի հետ հարաբերությունների ամրապնդումն ու հետագա ընդլայնումը Ադրբեջանի Հանրապետության արտաքին քաղաքականության կարևոր բաղադրիչն է։ Մեր երկրների միջև պատմական, կրոնական և մշակութային կապերը նոր հնարավորություններ են բացում ռազմական ոլորտում առկա համագործակցության զարգացման համար։ Ռազմական համագործակցության ամրապնդումը, միևնույն ժամանակ, ամրապնդում է եղբայրությունը մեր ժողովուրդների միջև։ Փոխվստահության և եղբայրության վրա հիմնված բազմակողմ կապերն էլ ավելի խորացնելու նպատակով մեր երկրները սերտորեն համագործակցում են ի շահ երկու երկրների և տարածաշրջանի՝ բոլոր միջազգային կազմակերպությունների շրջանակներում։ Հրամայական է, որ մեր հարաբերությունները շարունակվեն և փոխանցվեն գալիք սերունդներին:

Հայրենական պատերազմն էլ ավելի ամրապնդեց ադրբեջանա-թուրքական կապերը։ 2020 թվականի դեկտեմբերի 10-ին Հաղթանակի շքերթում ադրբեջանցի և թուրք զինվորները ուս ուսի ուս քայլեցին Ազադլըգ հրապարակով։ Ադրբեջանական ժողովուրդը մեծ ուրախությամբ ողջունեց ադրբեջանցի և թուրք զինվորներին։ Այս պատմական օրը Ադրբեջանի բոլոր քաղաքները զարդարվել էին Ադրբեջանի և Թուրքիայի դրոշներով։

Ներկայում ադրբեջանա-թուրքական հարաբերությունները հիմնված են դաշնակցային հարաբերությունների վրա՝ Շուշայի հռչակագրին համապատասխան, և որպես դրա բաղադրիչ՝ հետևողական միջոցներ են ձեռնարկվում ռազմական շինարարության ոլորտում։ Մեր երկրների միջև փոխադարձ ռազմական համագործակցությունն էլ ավելի է ամրապնդում մեր միասնությունը։ Ադրբեջանա-թուրքական եղբայրական հարաբերությունները նպաստում են տարածաշրջանում խաղաղության և կայունության պահպանմանը:

Անկախության համար մղվող մարտերում թուրք զինվորի անպարտելիությունը, թուրք ժողովրդի տոկունությունը խոստովանել են նաև թշնամիները։ Անկախության պատերազմում թուրք ազգի ցուցաբերած սխրագործությունը ոսկե տառերով է գրվել Թուրքիայի պատմության մեջ»,- ասվում է շնորհավորական ուղերձում։